3679/2022-2023

Aizawl, 25.02.2023: Chief Minister Pu Zoramthanga chuan vawiin khan Zarkawt Community Hall chu khuallian niin a hawng. He hall hi NEDP atanga sum hmuh cheng vaibelchhe 7 hmanga sak a ni.

Chief Minister chuan sawrkar hmasain a sakna tur sum ruahman a bul a lo tan tawh community hall changtlung tak siam vawiina hawn a ni ta chu lawmawm tiin, khawtlang tana tangkai tak a nih ngei a duhsak thu a sawi a. A hmunhma an hman tangkai dan te lawmawm tiin, hripui lengin hnathawh ti khaihlak deuh mahse tha taka chhuah a ni chu a lawmpui thu a sawi. Chief Minister chuan Mizote vanneihna chu 'community' anga inhlawmfel taka kan awm hi a ni tiin, hetia mipui kan inphuarkhawm that hian kan ram leh hnam min ti chak a ni a ti a. Chumi tur chuan kan inhmuh tam a inkhawm tam a pawimawh a ni tiin, heng community hall kan hman tangkai dan te hi kan hnam ziarang pawimawh tak lanchhuahna a nih thu a sawi.

Zarkawt Community Hall sa tur hian Suvidha Infrastructure, Upper Khatla, Aizawl chu contractor a thlan a ni a. Kum 2018 October ni 4 khan kut thlak tan niin, kumin 2023 January ni 31 khan zawh fel a ni. Chhawng nga a sak niin chhawng tin zau zawng belhkhawm hi 1382.80 Sq.m a zau a ni a. Basement 3 ah chowkidar quarter  Basement 2 ah Multipurpose Hall, Basement 1 leh ground floor ah lirthei dahna, first floor ah mi 210 leng Multipurpose Hall, second floor ah court hnih awmna badminton hall siam a ni.

Hall hawn puala inkhawmah hian MLA Pu C. Lalmuanpuia, Veterinary, Fishery and Sericulture Board Vice Chairman leh Hachhek bialtu MLA Pu Lalrindika Ralte te an tel bawk.

Inkhawm hi Zarkawt Local Council Chairman Pu Lalawmpuia chuan kaihruaiin PWD Engineer-in-Chief Pu C. Lianhmingthanga chuan technical report a pe a. Zarkawt Local Council Vice Chairman Pu Zodinsanga chuan lawmthu sawiin hun a khar a ni.

Chief Minister chuan vawiin vek hian Zarkawt field a hmalakna hnathawh mek chu a hmunah kalin a enfiah nghal bawk.

Attachment

  • Loading attachment...