3678/2022-2023

Aizawl the 25th February 2023 : Vawiin khan School Education Minister Pu Lalchhandama Ralte chuan Buizova Hall,  E. Phaileng-ah Mizoram Upa Pawl Chalfilh Area Conference vawi 33-na a hmanpui.

Minister chuan he conference-ah hian thu sawiin MUP memberte chu Pathian malsawmna, hriselna leh chakna an neih avanga member ni thei an ni tih sawiin tha leh zung tam tak an lo sen tawh avanga vawiina chhungkua, khawtlang leh ram hi awm thei a ni a, an hlu hle a ni a ti.  MUP member-te chu ram leh khawtlang neitu an nihna hre reng tur leh chhungkuaah pawh an tu leh fate laka inthlahrung lo turin a fuih a ni. 

Minister chuan Pathianin Mizote hnamah min din a, țawng leh sakhua min pe a ti a. Tun dinhmunah chuan Mizo nunphung hre mumal lo țhangthar zingah an lo awm zel a, Mizo pasalțhate an theihnghilh tawh a, hnamdang culture an ngaisang țan a. Chuvangin,  Mizo nunphung hi ngaihsan tir leh an ngai a, nun kawng dik kawhhmuh an ngai tih sawiin chumi kawngah chuan upate hi an pawimawh a ni a ti a. Țhangtharte chu Mizo nunphung hrilh thar tur leh kawng dik kawhhmuh zel turin kalkhawmte a sawm a ni.

Khuallian Pu Lalchhandama Ralte chuan ramin hma a sawn nan inkalpawhna kawngpui țha, zirna țha leh hriselna țha neih a ngai a, heng mamawh bulpui neih nan hian sorkarin hma a la mek a ni a ti a.  He tlangdung ațanga Manipur kalpawh nan central sorkarin vbch 1500 a sanction tawh a, Bagha nena inkalpawhna tur pawh bawhzui zel a ni a ti bawk.  

Minister chuan MUP thupui 'midangte tana malsawmna' tih chu ropui a tih thu leh chumi nena inhmeh tak Chalfilh tlang tui hna humhalh leh ngaw siam hmalak mek hi chhunzawm ni rawh se tih an rel chu lawmawm a tih thu a sawi. 

Pu RK Thanga, Vice President, MUP Gen Hqrs pawhin thu a sawi a, kum upa kawl chuan rangkachak hlu tak an kawl tih hre turin a chah a, MUP hmalakna te a sawi bawk. 

MUP Chalfilh Area Conference hi Pu K. Lalruata, Area President-in a kaihruai a,  Chalfilh huamchhunga MUP Branch hrang hrang ațangin palai 184 an kalkhawm a, report te ngaithlain an member thite an sun a. Hruaitu thar an thlang a, ro an rel zui bawk. Chalfilh Area-ah hian MUP Branch- 7 member 769 an awm a, kum kalta chhungin member thi 26 an awm a ni.

Attachment

  • Loading attachment...