Tukin zing khan Chief Minister Pu Lal Thanhawla chuan NEDP hnuaia cheng nuai 700 seng a sak tur Zarkawt Community Hall lungphum a phum.

Chief Minister chuan ram hmasawnna ruhrel, khawtlang in an mamawh leh an tangkaipui tur tam zawk neih hian ram a thang a changkanna kan pan zel tih a lantir a ni, tiin "infrastructure development" chu ram hmasawnna tehfung langsar tak a nih thu a sawi a. Tun hnaiah Aizawl khawchhung leh Mizoram hmun hrangah hall tha tak tak hawn a nih thu te sawiin, vawiinah Zarkawtah chutiang sakna tur chu lungphum phum a ni leh chu lawmawm a ti a. A hmunhma mil zela PWD engineer ten ruahmanna tha tak an siam thiam thu sawiin, Hall sak a nih theih nan a sawrkar lam leh khawtlang hruaitute hmalakna chungah lawmthu a sawi bawk.

Bialtu MLA Pu Lal Thanzara, PWD Minister pawhin Zarkawtin khawtlang mamawh tak Hall tha tak din a ni tur chu lawmawm a tih thu leh ruahman ang taka a sak hna thawh a beisei thu a sawi.

Hall sakna lungphum phum inkhawmah hian Er. R. Lalrintluanga, Chief Engineer, PWD chuan building sak dan tur report a pe a. Hall hi PWD chuan architectural leh structural design siamin, Suvidha Infrastructure, Upper Khatla ten an sa dawn a. Thla 36 (Kum thum) chhunga sak zawh fel tura ruahman a ni a. Chhawng ruk a sak tur niin, floor zawng zawng zau zawng belhkhawm chu 1282.69 sq.metre a ni dawn a. Basement-III ah Chowkidar quarter leh generator dahna siam tur a ni ang a, Basement-II chu mi 120 lenna Multipurpose Hall a ruahman niin, Basement-I chu lithei dahna leh tui zem hunna atan hman tur a ni a, Ground Floor ah lirthei dahna leh Store room siam niin, First Floor chu mi 214 lenna Hall a siam tum a ni a, a chung ber Second Floor ah Badminton Court pahnih siam ruahman a ni.