Nimin khan 64^th Wildlife Week kharna inkhawm leh Reptile Enclosure sak thar hawnna hun Aizawl Zoological Park, Sakawrtuichhunah hman a ni a, Dr. CH.M Rao, IFS, Principal Chief Conservator of Forest (Wildlife) & Chief Wildlife Warden chu Khuallian niin he hun hi a hmanpui a, Dr K.Kire, IFS, APCCF (P&B), Pu Liandawla APCCF, Pu H Lianmawi DCF (WL), Ritu Raj Singh, IFS, CCF (Planning), Pu Lalthlamuana IFS, CF (WL) , ASEP, Mizoram Photographer Association, Forest Training School zirlai leh Sakawrtuichhun NGO hrang hrang hruaitu ten he hun hi an telpui a ni.

Khuallian Dr. CH.M Rao, IFS, Principal Chief Conservator of Forest chuan, Ramngaw leh Nungchate pawimawhzia hriate tan chuan Kartin hi Wildlife week a ni a, nitin hian tan kan lak thar a tul a ni, a ti a, Kan ramngaw leh nungchate humhalhna kawnga pawimawh ber leh mawhphurna lian ber neitute chu mipuite hi kan ni a hma la tur pawhin mipuite hi kan pawimawh ber a ni, a ti bawk. Dr. CH.M Rao chuan Aizawl Zoological Park ah Ramsa tam zawk a awm thuai theih nan hmalak anih tur thu sawiin Zoological Park chu ennawm enna hmun mai ni lovin thangthar ten nungchate hlutzia an zir thar theih nana hmanraw tangkai tak anih thu a sawi bawk.

64^th Wildlife Week kharna inkhawm hi Pu Liandawla, APCCF in a kaihruai a, Pu H Lianmawia DCF(WL) in Wildlife Week thupui “Big Cats-Predators under Threat” chungchang sawizauna hun a hmanga, Pu Lalthlamuana Pachuau IFS in lawmthu sawina in huntawp a hmang  a ni.

Wildlife Week hi October Ni 1-7 chhung khan hman a ni a, hemi chhung hian a duh apiang tan Aizawl Zoological Park chu a thlawnin tlawh theih a ni a, Forest Division leh Protected Area hrang hrangah ramngaw leh Nungcha humhalhna kawngah hmalak a ni bawk.Wildlife Photography Competition te buatsaih niin a tithe zual 8 te hnenah lawman sem a ni a, Lalthakima Chhakchhuak chu Pakhatna niin Cheng 7000/- leh certificate a dawng a ni.

Aizawl Zoological Park a Reptile Enclosure tharhawnah hian Cell 5 siam a ni a, Saphai 6, Satel 4, Telrang 2, Telpui 8 lehChawngkawr 3 dah a ni. Reptile Enclosure thar hi Cheng Nuai 32.59 seng a sak a ni.