October ni 4,2018 (Ningani) khan NEDP hmalakna in Mizoram Journalists' Association (MJA) hruaitute chuan Mizoram khawfai bera thlan Biate tlawhin an hmalakna a hmunah an en. 

MJA hruaitute leh Biate Village Council te hi Biate VCP Pu RV Hluna inah an inkawm a, Biate VC te chuan faina chu kum 1935 vel atanga an kalpui tan nia sawiin kum 2012 atangin tih tak zetin beihpui an thlak tih an sawi. Biate VC te chuan naupangte pawhin faina chu a takin an nunpui tawh tih an sawi a, a hranpaa bawlhhlawh siam an awmlo nia sawiin khawlaia bawlhhlawh tla a awm anih pawhin naupangte pawhin an chhar nghal zel tih an sawi a. Khawlai cheina pawh veng hrang hrang mipui thawhkhawm hmanga chei a ni tih an sawi bawk. 

Tun dinhmunah Biate ah hian veng 14 awmin veng hrang hrangte hian anmahni senso in bawlhhlawh bawm leh cheimawina an siam thin a. Biate VC kaihhruaina hnuaiah Biate Town Faina Committee dinin brand ambassador 5 an awm bawk. Biate Town Faina Committee hmalakna in kar khatah tum khat motor hmangin bawlhhlawh paih a ni thin a, bawlhhlawh hi a tawih thei leh tawih theilo thliar hrangin a tawih theilo hi an hal ral a, a tawih thei hmangin leitha an siam thin a, hei hi mipui hnenah an hralh chhawng leh thin a ni. 

Biate khua tlawhtu MJA hruaitute hi MJA General Headquarters President Pu Zonunsanga Khiangte chuan a ho a ni.