3015/2022-2023

Aizawl, 10.12.2022: Chief Minister Pu Zoramthanga chuan vawiin khan Zemabawk North Branch YMA Silver Jubilee lawmna, Basketball court a buatsaih chu khuallian niin a hmanpui a. Thlanmual In thar a hawn sak bawk.

Chief Minister chuan Zemabawk North branch YMA in kum 25 an tling ta chu a lawmpui thu sawiin, din tirh atanga mawhphurtu te leh vawiina hruaitute hmalakna chu fakawm tiin kalkhawmte Jubilee chibai a buk a ni. Chief Minister chuan ram hmasawn zel naah kan khawtlang nun a siamthat ngai tam tak a awm thu sawiin, chung zingah chuan hausak thut duh avanga diklo taka sum lakluh pawi tihlohna leh ruihhlo a lansarh thu a sawi a. YMA in a do kawnga hma a lakna chu fakawm tiin, sawrkar leh pawl pakhat emaw, kohhran ang chauha do hneh theih a nih loh avanga ram pum mipui kan thawhho a pawimawh thu a sawi a ni. Chief Minister chuan tun digital age a nasa tak maia khawvel in hma a sawn naah hian chanchin tha aiin chanchin thalo a darh chak zawk tih mai theih tur a nih avanga fimkhur a tul thu a sawi a. Kan ram chungchang sawi hian natna chi hrang hranga a ber kai na te, ruihhlo leh thil dangah a thalo zawnga lan na kan nei fo chu thil pawi tak a nih thu a sawi. Hengte hi thu dik ni mahse, kan chaklohna leh thatlohna sawi te hian siamthat duhna thinlung ti hnual a, beidawnna a thlen zawk ang tih erawh a hlauhawm thu a sawi a. Chhiatni thatni a kan intawiawm dan leh tha tam tak kan khawtlang nun a awm te hre reng chungin, Sorkar, kohhran, NGO leh mipuite pawnfen sawichhing in, khawvel in a entawn tur ni thei kan ni tih hria in, a beidawng zawnga kal lo in, insiamtha in hmasawn zel turin hma la turin Chief Minister chuan mipui a sawm a ni.

Indian Oil Corporation Ltd. (IOCL) in an Corporate Social Responsibility (CSR) atanga cheng nuai 26 leh sang 8 an sanction hmanga Thlanmual In sak a hawn chu Chief Minister chuan tha a tih thu a sawi bawk a. Company hrang hrang te'n mipui hnena pek let nan CSR ruahman a nih dan leh, khawtlang tan tangkai taka hman a nih thin dan te a sawi a ni.

AMC Ward-VII Councillor Pu Vanlalneia chuan he hunah hian thu a sawi bawk a. YMA chu khawtlang a mi harsate leh puih ngaite tuamhlawm a puitu, siamthat ngai te siamthatu an nih avanga mipuiin kan tawiawm that a pawimawh thu a sawi a. Khawtlang siamthat a sual do hna thawh naah thil thalo duhtu ten thil tha tih tumte an dodal thin thu sawiin, huaisen a țul thu a sawi a. YMA hmalakna chu vangtlang leh khawtlang tana tha leh tangkai tur a nih a pawimahw thu a sawi bawk. AMC councillor chuan ram leh khawtlang siam that hna chu hruaitute kutah chauh a nih loh thu sawiin, mipui pawhin kan mawhphurhna te hria in, dan zawm zel tur kan nih thu a sawi.

CYMA President Pu R. Lalngheta chuan he hunah hian Souvenir tlangzarhin thu a sawi bawk a. YMA chu Mizo zawng zawng insuihkhawmna, Mizo inpui a ni tiin, YMA member te'n a humhalh kawngah ke an pen a tul thu a sawi a. Ramin hmasawnna tur tam tak a la neih thu leh, a bik takin sum duh luat avanga kut tlinglo a sum lakluh pawi ti lo an tam lutuk chu veiawm a tih thu a sawi a. Hengte hi ram tichhetu a ni tih hriat pawimawh a tih thu a sawi a. Ram siam that hi pawl, kohhran leh sawrkar hruaitu leh hotute kutah chauh awm a nilo tih hre tharin, taimakna, tumruhna leh huaisenna in ram humhalh a, Zonun zemawi vawng nung zel tur kan nih thu a sawi.

Vawiin hian Chief Minister chuan Decembe rni 5, 2022 a Zembawk North a inkan na hnuhma chu a hmunah a en nghal a ni.