No.3634/2020-2021

Aizawl the 30th July, 2020: Chief Minister Pu Zoramthanga chuan vawiin khan ZIDCO (Zoram Infrastructure and Industrial Development Corporation Ltd.) office chu tlawhin, thawktute nena inkawmna a neihnaah Mizoram hmasawnna atana mawhphurhna lian tak an neih thu leh thahnemngai taka thawk turin a fuih a ni.

Chief Minister chuan PSU changtlung tak state in a neih chu a pawimawh thu a sawi a. State budget piah bakah sawrkar laipui chuan state ten hmasawnna hna an thawhna tur suma ruahman thin thahnem tak chu state tam takin an hman tangkai tawk loh thin thu a sawi a. Heng sum hi hmang tangkai tur chuan ram tihhmasawnna tur project tha tak siam in, chung project an lo pawmsak te chu a thawhna tur sum chu state sawrkar department kaltlangin emaw, Central Public Sector Undertaking (PSU) kaltlangin emaw pek thin a nih thu a sawi a. State thenkhatah chuan state PSU changtlung tak awmin, Central PSU ang chiahin sawrkar laipui pawhin state PSU kaltlangin state chu sum pe in, chumi atang chuan hmalakna tur ruahman zui a nih thin thu te a sawi. Chutiang chuan ZIDCO pawh hman tangkai a nih theihna turin Chief Minister chuan industry mai bakah infrastructure khawih thei turin hma lak a nih tak thu vawiin hian a sawi a ni.

ZIDCO Chairman Pu Lalthlangliana, Ex-MLA chuan State Planning Board rawtna angin ZIDCO chu Infrastructure (Construction works) lam khawih thei tura duan thar a nih dan te, a hmingah pawh “Zoram Infrastructure and Industrial Development Corporation Ltd’ ti-a thlak in June 4, 2020 khan Companies Act hnuaiah Ministry of Corporate Affairs in a pawmpui thu a sawi a. Industrial development mai ni lovin infrastructure development pawh ZIDCO chuan a thawh theih tawh dawn avangin tunah hian Engineering Wing pawh tih len tura hmalak mek a nih thu a sawi.

ZIDCO Managing Director Pu Lalramsanga Sailo, IRS chuan ZIDCO chu Loan financing ah mi in an hriat tam berna a nih thu leh mi 4961 hnenah loan vbc 45.76 lai a pek chhuak tawh thu te, heng te avanga Mizoram pumah chhungkaw tam takin eizawnna hlawhtling tak an neih phah tawh thu a sawi ani.

ZIDCO hi kum 1978 a din niin, Mizorama corporation upa ber a ni a. Tunah hian Chairman Pu Lalthlengliana leh Managing Director Pu Lalramsanga Sailo ho-in thawktu 40 an awm a. Branch Office pakhat Lungleiah a nei. ZIDCO hian Financial institution hrang hrang heng SIDBI, NMDFC leh HUDCO atangin vbc 37.69 la-in industry din nan leh sumdawnna atan loan a pe chhuak thin a ni.

Tun hma atang leh tun hun thlengin ZIDCO hian construction works engemaw zat thawkin Central Ministry hnuaiah cheng vbc 40 hu a lo thawk tawh a ni.

Kumin April thla atangin Mizoram pumpui buhfai supply hna pawh ZIDCO chuan a thawk mek bawk a ni.

Vawiin hian Chief Minister hi Adviser to CM Pu C. Lalramzauva'n a tawiawm a ni.