No.3633/2020-2021

Aizawl, the 30th July 2020 : "Mizo zingah kut hnathawk tur bik leh kut hnathawklo tur bik kan awm lo". He thu hi vawiina Sports and Youth Services Minister Pu Robert Romawia Royte in Mizoram Mistiri Association(M.M.A) General Headquarters thar Upper Republic-a a hawnnaah a sawi.

Sports Minister Pu Robert Romawia Royte, MMA Senior Adviser ni bawk chuan kut hnathawh leh themthiam hrang hrang pawimawh dante sawiin Mizo zingah kut hnathawk tur bik leh kut hnathawk lo tur bik kan awm lova. Mizote chu hnam ang pawha mahni hna mahni ngeia thawk thin kan nih angin hna hrang hrang pawh kan thiam chak hle a ni, a ti a. Mizo zingah mistiri thiam tak hnamdangte ai pawha thiam an tam thu sawiin he huna kalkhawmte chu rawihtlak leh chhawrtlak a awm tur leh hun vawn that a pawimawhzia hria a, rinawmna vawng tlat turin a fuih a ni.

Minister chuan MMA hruaitute chu an member te hmakhua ngaia an tan theihtawp chhuaha hma la turin a fuih bakah member tam thei ang ber an pawlah an inziahluh theih nan tan la turin a fuih bawk a ni. Eng hna pawh thawk dawn se, an thawh tur hrechiang hmasa thin tura chahin, a kaihhnawih dan leh hraite hriat a pawimawh thu a sawilang a, dan leh hrai hriat loh avangin hamthatna leh duhsakna dawn tur ang te pawh mi tam takin an chan fo thin, tiin he hun a tel te chu kuthnathawktute kaihhnawih dan leh hrai te ngaihsaka hriat tum thin turin a chah a ni. Minister chuan MMA member te chu Mizoram Building and Other Construction Workers (MBOCW) Welfare Board ah inziaklut vek tura hrilhin, Board kaltlanga hamthatnate chu kuthnathawktu ten an tangkaipui hle tih a sawi.

Pu Robert Romawia Royte chuan MMA headquarters thar a hman turin Computer set khat leh pawisa fai Rs.10,000/- a hlan a, mamawhna an neih chuan engtik lai pawha puih a inhuam thu a sawi bawk a ni.

He programme hi MMA chairman Pu C.D Lalthlamuana chuan kaihruaiin he hunah hian MBOCW Welfare Board hotute pawh an tel a. MMA hi July 2007 a din niin Mizoram pumah Branch 76 leh Member 2168 an nei mek a ni.