Nimin (8.12.2016) khan Chief Minister Pu Lal Thanhawla chuan ni 3 awh, Mizo Zirlai Pawl (MZP) General Headquarters buatsaih Zo hnahtlak te inpumkhatna leh inunauna tichak zawnga hawi Zofest 2016 Zokhawthar a an buatsaih, kharna programme chu khuallian niin a hmanpui a, he programme hi A.H. & Vety. Minister Pu C. Ngunlianchunga, a hawnnaa khuallian leh Parliamentary Secretary Pu Joseph Lalhimpuia pawhin khualzahawm niin a hmanpui bawk.

Chief Minister Pu Lal Thanhawla chuan Kumpinu Sawrkar policy divide and rule tuar nasa berte chu Zohnahthlak te hi kan ni a, ram pathum - India Dominion, Pakistan Dominion(tunah Bangladesh a awm ta) leh Burma Dominion(tunah Mynamar) ni ta ah te hian min then a, India ah phei chuan state pali - Mizoram, Manipur, Assam leh Tripura ah te hian kan awm darh a. Chuti chungin kan inuana leh thisena kan inzawmna te hi a bo chuang lova. Tunah rih chuan rorelna pakhat hnuaiah awm lo mah ila, Pathian in min hunna ram theuha Ringtu kan nih angin khua leh tui tha, rinawm leh tangkai kan ni tur a ni a, hei hi Zozia a ni a, hetianga awm turin ka chah duh che u ni, a ti a. Engtik emawni hunah chuan Pathian hian Zo hnahthlak te hi rorelna pakhat hnuaia min la awm tir ka ring a, chutiang turin tun atangin inpumkhat zai rel a, kan inlaichinna leh kan in unaunate ti chak turin kan ngaihtuahna leh rilru te senga hma kan lak a ngai a ni, a ti a. MZP ten Zo hnahthlak te insuihkhawm zelna atan Zofest an buatsaih chu ropui tiin an chungah lawmthu a sawi.

Chief Minister chuan Duhlian tawng chu Zo hnahthlak te phuarkhawmtu ni thei se tia a duh thu sawiin Duhlian tawng hi Zo hnahthlak te tawng hman tam ber kan zavaia kan tawng hman tlanglawn ber a ni a, a neitu bik kan awm lova, a neitu vek kan ni tih hi kan hriat a pawimawh hle a. Duhlian tawng mi thenkhat ten an thiam loh avangin an Zo hnahthlak nihna a bo chuang lova. Min tuamkhawmtu anih angin er mai lovin thiam tlan kan tum phawt chuan Pathianin min tih ropui zel ang tih ka ring a ni, a ti a. Hmun danga awm hnam tlem zawk te chu Zo hnahthlak a sengluh a pawimawh thu sawiin Zo hnahthlak te hi kan inhloh a thiang lova, kan in chan tur a ni hek lova, hetiang hawia ngaihtuahna kan siama hma lak thar a pawimawh a ni, a ti a. Zo hnahtlak te hi kan awmna theuha inngeih taka kan awm a ngai a, kan inkara kan buai chuan kan in tai te ang tih a hlauhthawnawm tiin tanrual a pawimawh thu a sawi.

Ramri hung chungchang sawiin Khawtlang lamah Bangladesh nen kan ramri chu hung a ni a, hemi avanga kan ram engemaw zat kan chan hi a pawi hle a, Khawchhak lamah hetiang ramri hungna hi kan chenna ram sawrkar te hian tum mahse kan duh lova, kan dodal reng a, inzawmkhawmna daltu awm apiang hi kan dodal zel tur a ni, a ti. Nu leh pa nih tling lo hle mah ila, Mizoram hi Zofate Jerusalem leh Zo hnahthlak te Inpui ber a ni a, Inpui nghaktu kan nih angin a lo lut te tlangnel taka kan lo lawm leh kan enkawl a pawimawh a, Mizoram Sawrkar hi Zo hnahtlak te Sawrkar awmchhun a ngaih theih anih avangin tlangnel takin neitu rilru in neih ka duh a, min zilhhau leh pui turin ka ngenin ka chah duh che u ni, a ti. Mizoram pawna cheng Zo hnahthlak, a bik takin Myanmar leh Manipur a awm te chuan sawrkar ngheng em em lova, an mahni kea dinga, zahawm taka an mahni an intung ding leh an inchawm thei chu ropui leh fakawm a tih thu sawiin an entawntlak hle a, anni atangin zir tur tam tak kan nei a ni, a ti bawk.

Inkalpawhna tha in inlaichinna leh inunauna a tih chak thu sawiin, inkawlpawhna a tam thei ang ber siam kan duh a, Zokhawthar atangin Falam leh Tiddim thlenga inkalpawhna kawng tha kan la nei dawn a, Chhim lamah lui kanna tur lei 4 lai dawhna tur Mizoram Sawkarin a dil chu Sawrkar Laipuiin an pawm tawh a ni, a ti.

Zofest 2016 palai te chu Zo hnahthlak inpumkhatna tichak tu ni theuh tura chahin kalkhawmte chu Krismas lo awm tur duhsakna a hlan a ni.

Chief Minister hian Zofest 2016 denchhena Souvenir buatsaih ‘Rihlihpui’ tih chu he hunah hian a tlangzarh a. Zofest denchhena MZP in footballer Tv. Jeje Lalpekhlua leh Mt. Everest lawn chhuaktu Nl. Lalrintluangi te hnenah chawimawina thuziak an buatsaih pawh a hlan bawk a ni.

Khualzahawm Pu Joseph Lalhimpuia chuan khawvelah tunhmaa ram leh hnam tlem leh te zawk ni thin ah movement awm avanga an insuihkhawm avangin ram ropui leh hnam lian zawk dinin khawvelah an hming a than chhoh dan te sawiin Zohnahtlak te inpumkhatna atana theitawpa hmalatu leh engtikah emawni rorelna pakhat hnuaia kan la awm ang tih ring ngam ram hruaitu kan nei hi kan vannei a, a ropui hle a ni, a ti a. Commerce & Industries Department in Mizo hnam rohlu puan leh design te neitu nihna ‘patent’ neihna kawngah chak takin hma lak mek a nih thu a sawi bawk a ni.

Zofest 2016 ah hian palai inziaklut 1400 vel an awm a. Nimina kharna programme ah hian Zo hnahtlak hnam hrang hrang ram chhung leh ram pawn atangte in hnam lam hmuhnawm tak tak entir a ni a. Chung zinga chuan Biate Cultural Organization te, Kachin University Students’ Association te, Chin Youth Cultural Association te pawhin hnam lam hmuhnawm tak tak an entir bawk a. Hnam hrang hrang 19 te hnam incheina Costume Parade in mipui lawm a hlawh hle a. Zofest 2016 ah hian India state hrang hrang bakah Bangladesh leh Myanmar atangin palai engemaw zat an tel a ni.