Vawiin khan Mizoram-a naupang bengngawng leh tawngtheilo te puala school hmasa ber, Deaf School of Mizoram chu Social Welfare Minister Pu P.C.Lalthanliana’n Vaivakawn-a Rev. S.Lalmuana buildingah a hawng.

Kumin May 11 atanga din tan, Deaf School of Mizoram chu Minister chuan ri hriatna lama harsatna nei naupang tawngthei lo te tana zirna mumal tak buatsaihna kawngah bul tanna lawmawm tak a ni, a ti a. Hearing Impaired Parents’ Society of Mizoram(HIPSOM) ten hemi atana hma an lakna chu fakin he school hmasawn chhoh zelna turin sorkar leh HIPSOM te chu an tang tlang zel dawn a ni, a ti a. Vawi leh khatah changtlung thut lo mah se, Central funded school a nih chhoh thuai a beisei tih sawiin hemi atan hian theih tawpa tan la chhunzawm zel turin HIPSOM leh zirtirtute chu a fuih a. School in a mamawh computer 2 a pe a ni.

Social Welfare Director Pi Vanlaldini pawhin thu sawiin HIPSOM hmalakna chu Social Welfare department tan a lawmawm tak zet, a ti a. American sign language chu heng naupangte tan hian thusawina atan leh nunphung pangngai anga an nun theihna tur te, qualification pawimawh te nei ve a, sorkarah pawh an chanvo an luah theihna tur a nih avangin a pawimawh em em, a ni a ti a. Hetiang zirtir na lamah hian mithiam tam zawk mamawh a ni in hnaruak luah tur an la awm mumal lo tih a sawi.

Deaf school ah hian Class 1-8 zirna kalpui niin American sign language hmanga zirtirna pek a ni a. Tunah hian Mizoram hmun hrang hrang atangin naupang 19, mipa 8 leh hmeichhia 11 an awm a. Zirtirtu 5 in he school hi an enkawl a. Vawiina School hawnna ah hian mi hrang hrangin thusawina hun an hman bakah naupang ten an thiam thil hmuhnawm tak tak te an entir bawk a ni.