Home Minister Pu R. Lalzirliana chuan vawiin khan 5th Bn. Assam Regiment atanga pension chhuak intelkhawm Ex-Fighting 5th Association (EFFA) ten an regiment-in Battle Honour of Chhamb an hmuh lawmna hun a hmanpui. He lawmpuina hi kum 1971-a Pakistan nena indo tuma 5th Assam Regiment ten indonaa an huaisenna leh an tih thatna avangin India ram sipai battalion zawng zawng zingah anni chu an indona hmun hming chhalin ‘Honour of Battle’ hi India Sorkar chuan a hlan a ni. Vawiin hun, Aijal Club-a hman hi Parliamentary Secretary Pu Hmingdailova Khiangte, IPS (Rtd.) leh EFFA Senior Adviser ni bawk chuan telpuiin, Surg. Lt. Cdr (Retd.) Lalnuntluanga, Sainik Welfare & Resettlement Director chu khualzahawm a ni.
Home Minister chuan Chhamb indonaa huaisen taka ram tana beite chu chhuanawm a tih thu a sawi a. Ram innghahna tak tak chu sipai te hi an ni lo theilo a ni, tiin Sorkar pawhin sipai bang leh tang mek te a ngaihsak thu leh, an chhungte thlengin a tul anga ruahmanna siam thin a nih thu a tarlang a. Mizo thalai te zingah sipai a lut an tam zawk theih nan Sorkar pahin hma alk thu tarlangin, Home Minister chuan recruitment tih a nih dawnin training-te pek annih thin thu leh, chumi avanga Mizo thalai sipai a tling pawh an pun phah a hriat thu a sawi a. Sipai hna chu ram tana inpekna a nih vanga a chhuanawm mai piah lamah mahni inthununna tha tak nen inkaihruai an nih avangin an hriselna pawh a tha a ni a ti a. Sipai bang tawhte atangin zir tur tam tak kan neih thu Pu R. Lalzirliana chuan sawiin, chhiatni thatni a an inngaihpawimawh leh an intawiawm thin dan te leh, vengchhungah pawh mi tha leh hmantlak tak an nih chhoh zel thin te chu fakawm a ti a ni.
Minister Pu R. Lalzirliana chuan Krismas leh Kumthar vuakveta halpuah leh silai lem a mu nei khapna thuchhuah chungchang sawi telin, heng halpuah te hian hriselna kawngah pawh nasa taka a thalo zawnga nghawng nei thei anih avangin khapna thu hi mipuiin an thlawp a beisei thu a tarlang a. Zawrh khap anih avangin check-gate ah te pawh enfiah a nih tur thu te a tarlang bawk. Home Minister chuan Mizoten hnam chimral kan hlauh thin chu hlau lo tura chuan hna thawh peihloh kan neilo tur ani, a ti a. Sorkar hmalakna in tlawmngai pawlte nen tangkawpa Cement mistiri training neih a nih thu leh, hmun tam takah chuan an chhawr tangkai tawh thu sawiin, Minister chuan kan thiam ve reng kan thawh tur awm anga kan ngaihloh avangin hnam dang kutah a tla leh mai thin a ni, a ti.
Parliamentary Secretary Pu Hmingdailova Khiangte, kum 1971 indo laia Chhamb Sector-a “C” Coy Tiger ni bawk chuan Chhamb Sector la tura Pakistan sipai rawn thawkte nen an in beih dan a sawi a. Pakistan sipaite chuan an tum ber chu 5th Assam Battalion hneh a, Manavartavi lui kan a, a rang thei anga Aknoor lei (bridge) control a ni a. Ni thum chhung 5th AR Regiment ten an lo dan avangin an tum an puitlin theih takloh thu a sawi a ni.
Ex-Fighting 5th Association (EFFA) –ah hian sipai bangte bakah indonaa pasalthate hmeithai, an pasalten an boralsan tawhte pawh an tel a. Kum tin Chhamb Honour of Battle hi December ni 5-ah lawm thin a ni a, kuminah erawh remchan zawkna avangin vawiin hian a hman a ni.
