3349/2024-2025

Dated West Phaileng, the 4th December, 2024: Vawiin khan West Phailenga Lalbuanga Runah Mizo Zirlai Pawl buatsaih Zofest 2024 inkhawm vawi hnihna chu Chief Minister Pu Lalduhoma chuan khuallian niin a hmanpui.

Zofest Souvenir, Zawlbuk a tlangzarh zawhah thu sawiin Chief Minister chuan, MZP hian Mizorama politician eiru lo berah min lo thlang tawh a, remna leh muanna a awm theih nana ka lo thawh ve ang ang teah min lo chawimawi tawh bawk. In zinga tel hi nuam ka ti a, in sawmna pawh hi ka pawm leh mai thin. Kawng tam takah MZP nen ram leh hnam tan hna kan thawkho mek a, kan hruaitute an felin an huaia, "Thil dik lo siamtha tura hma in laknaah sawrkar mitmei veng vak suh u, tiin ka lo chah mai thin", a ti.

A thusawi dang tlangpuite chu:

1. Zofate kan tam a ngai a, fa kan ngah deuh deuh a tul. Kan ram hi ram dangte nena khaikhin chuan density of population a la hniam a, mihring tam zawk chenna tur ram kan la nei a ni. Pun hi kan sawrkar policy a nih avangin nupa, fa pathum leh a aia tam nei chinte hamthatna duan hial kan rilruk.

2. Zofate kan inpumkhat deuh deuh tih kan hmu. Mipuite chauh kan inpumkhat lo va, kohhran thlengin kan inpumkhat deuh deuh a ni. Hman ni lawk khan Mizoram Council of Churches din a ni a, kar hmasa mai khan International Chin Christian Youth Conference, Lawngtlaiah ka va hmanpui a, Lawngtlai district-a kohhran pahnih inzawmkhawm LIKBK ten an inpumkhatna silver jubilee an lawm bawk. USA ah zo hnahthlak kohhran hrang hrang pakua ten zofate inpumkhatna lama hma la turin an intelkhawm ta bawk.

3. Chin Hills-a kan unaute inpumkhata an awm theih nan ka ho ngeiin vawi tam tak kan kan thukhawm tawh a, a umzui tur bik pawl pawh kan dina, chu pawlah chuan MZP President pawh hi a tel a ni.

4. Ram ro hlu ber chu human resource tha a ni. Ram leilung hausa tak te pawh a chhunga cheng mipuite thiamna leh theihnain a tlin loh chuan ram changkang an ni lem lo. Leilung hausakna nei lo mah se a chhunga cheng mipuiten an zir miau chuan ram hausa leh thil tithei takah ram tam tak an chhuak si. Chuvang chuan kan thalaiten zirna lo uar rawh u.

5. Handholding hmangin khai chhuah tlak thalaite, an bana kaia din chhuahtir kan tum a. Dahkham ngai lovin in hmalakna tur loan in la thei dawn a, sawrkar chu in dahkhamah kan tang dawn a ni. Loan in rulh that chuan a pung pawh kan pe kir dawn che u. He scheme chhawr thei khawp hian lo inbuatsaih sauh sauh rawh u.

6. Lehkha zir kawngah i lo thleng sang ta lo a nih pawhin theihna dang, i din chhuahpui theih thilpek i nei ang tih ring tlat ang che. Vawi hnih khat fail vangin lo hnual reng reng suh. Khawvela industry leh company lian tak tak dintute, entreprenuer ropui ber ber te hi lehkha zir sang lo an tam lutuk. Chutiang mi chu i lo ni ve reng thei a ni. Mizoram hi Industry awm lohna ram anga hriat a ni mek a. Industry rama kan chantir a ngai.

7. Mizote hi tunah hian khawvela hnam damrei lo ber zinga mi kan nih ka ring. Thalai thi kan tam ngah lutuk, a bik takin ruihhlo vanga thihna a tam lutuk. Kan insiam that ngei ngei a ngai. Thalaiten ruihhlo hi lo hnar ngam ula, a bawihah lut reng reng suh u. Sawrkar pawhin theihtawp a chhuah dawn a, dan pawh siam that a tum a ni, tih te an ni.

Kumin hi Zofest vawi sawmna a ni a, thupui atan "Hrui khat vuanin" tih chu hman a ni. Nizan khan palaite lawmnain hun an tana, vawiin chawhma lam, an hun hnihna hi Chief Minister chuan a telpui a ni.

Pu Lalthianghlima, MZP President pawhin thusawiin, MZP in Zofest a buatsaih chhan ber chu zo hnahthlak unaute inkara inremna leh inunauna tha tundin a ni a. Manipurah te, Assam ah te, Tripuraah te pawh kan nghat kual a, a hlawkna hi a kum telin kan hmu chho zel niin kan hria, a ti a. Sawrkal kal dan fel tawk lo siam that tuma MZP in hma an lak thinnaah sawrkar thawhpui nuam an tih thu a tarlang bawk.

Inkhawm hi Pu C. Lalremruata, Vice President, MZP in a kaihruai a, Evan. VL Hruaisanga'n hunserh hmangin, Pu Chinkhanmanga Thomte, General Secretary chuan report a pe a ni. Kum 2002 khan Lamkaah Zofest hmasa ber hi neih a ni a, kumin West Phaileng Zofest-ah hian Mizoram chhung leh a thenawm state leh ram tea zo hnahthlak hnam hrang te bakah USA atanga lo tel te an awm a ni.