No.4255/2021-2022

Aizawl the 12th March, 2022: Chief Minister Pu Zoramthanga chuan tukin zing dar 7:00 khan ZOHANDCO building, Chaltlang Lily Vengah ZOHANDCO Sales Emporium chu a duh apiang dawr theihin a hawng.

Chief Minister Pu Zoramthanga chuan handloom leh handicrafts kutchhuak mawi leh tha tak tak te phochhuak a zawrhna hmun tha tak hawn thar leh a ni chu lawmawm a ti a. Hnam humhalh kawngah heng kan puan tah leh thiam hnang dehtute kutchhuak hi chawilar thiam a pawimawh thu a sawi. Chief Minister chuan Culture hi a thang in, a insiam danglam zel a. Chu chuan kan hnam inthuam te, kan tawng te, thu leh hla, khawtlang nunphung, ei leh in te a keng tel vekin, hnam puitling apiang an culture a hausak thu a sawi a. Kan nitin nunah kan hnam ziarang tilang theitu kan nunah bet tlat in, hnamdang pawhin an rawn hmuh theih a kan chawilar thiam pawimawh a ti a. Chung zawng zawngah chuan langsar ber tura a duh chu remna leh muanna, remna siamtu nihna hi ni se, a ti a. Chief Minister chuan remna leh muanna hi kan hnam nihna a bet tlat, midang pawhin an entawn theih tur langsar tak ni zel tura a duh thu a sawi. 

ZOHANDCO chu corporation dang thenkhat nen economy lam thlira chhan tha tak takte avanga chawlhtir a nih hnu ah hmabak tha tak nei nia hriat te, harsatna karah pawh tundin leh hram atana sawrkarin tha a tih avanga tundin leh a nih thu a sawi a. Hnam thuamhnaw leh kutchhuak hrang hrang chawisanna atan leh, puan tah leh thiam hnang duh lama eizawngtute eizawnna tihhmasawn kawngah an pawimawh thu a sawi a. State in hma a sawn nan ei turah a intodelh hmasak a ngaih thu leh, intodelh loh chuan chaklohna kan insiam ang bawkin heng kan hnam kutchhuak te hi kan humhalh a pawimawh thu a sawi a. ZOHANDCO thawktute chu hmabak zelah an hlawhtlin theih nan duhsak a hlan a ni.

 ZOHANDCO hi kum 2019 khan dinthar leh niin, tunah hian Chairman chu Pu C. Lalrammawia a ni a. Managing Director Pu Benjamin Lalzama niin, ani hian vawiin Sales emporium hawnna inkhawm hi a kaihruai a ni. Board of Directors ah mi 9 an awm a, office ah hian thawktu 19 an awm. Kum 2019 atang khan activities hrang hrang neiin, chung zingah chuan puantah leh thiamhnangdeha eizawngtute eizawnna chawilar tura expo hrang hrang buatsaih te, seminar buatsaih te a tel a ni.

Vawiin Sales emporium hawnna inkhawmah hian FCS&CA Minister Pu K. Lalrinliana, Bamboo Link Road Board Vice Chairman Pu Ramthanmawia, MLA Pu Zothantluanga leh Pu K. Laldawngliana te, AMC Mayor Pu Lalrinenga Sailo te leh mi pawimawh dangte an tel a ni.


Attachment

  • Loading attachment...