Zokhawsang a Assam Rifles hmun tur sak mek chu nimin tlai khan Chief Minister Pu Lal Thanhawla chuan a tlawh a. Chief Minister hi PHE Minister Pu S Hiato, Parliamentary Secretary Pu K S Thanga, Pu Lalramthanga, Secretary to Chief Minister bakah PWD, P&E leh PHE Chief Engineer ten an tawiawm a. Assam Rifles atangin Brig. S P Rawat, Commander HQ 23 Sector leh a hoten Chief Minister hi an tawiawm bawk a ni.

A hmunah hian Chief Minister leh Assam Rifles hotute chuan inkawmhona hun neiin Col. Gaurav Chaturvedi CO 26 Assam Rifles chuan Zokhawsang a Assam Rifles hmun tur sak mek chanchin tlangpui presentation neiin a tarlang a. Zokhawsang ram piaha lo leh huan neitute feh kawng kalna tur ram Assam Rifles lamin an pek theih tur leh tur loh CM in a zawhna chhangin Brig. Rawat chuan ngaituah leh enzui a nih tur thu CM a hrilh a ni.

Brig. Rawat hian Chief Minister chu kumin October emaw November thlaah 26 Assam Rifles Company khat an sawn tur thu hrilhin, a bak chu an chenna hmun tur sak zawh dan a zirin a tah tawla an insawn zel tur thu a sawi a. An mamawh hrang hrang - tui, kawlpetha leh kawngpui atanga Zokhawsang panna kawng siamthat te CM hnenah hian a thlen nghal a ni. Chief Minister hian a hmun a kal Department pathum Chief Engineer te chu Assam Rifles mamawh te phuhruk nana an hnathawh zawh tawh leh la hmabak te a zawt nghal a, anni chuan an hmalak tawh chin hriattirin kawlpetha leh tui lamah an hna chu an zawh thuai an beisei thu an sawi a. Kawng chhungchang PWD hotute chuan tun hma in BRO in a panna kawng an siam thu sawiin, black topping a chhiat nasat tawh mai bakah a kawng hi BRO in PWD kutah an la hlan lo a ni an ti. Chief Minister chuan kawng chungchanga hmalak a ni theih nan PWD engineer te chu enzui turin a chah.

PHE hotuten Assam Rifles tuipekna tur chu TB Tlang Zemabawk atanga pump a nih tur thu an sawi a, tui pipe metre 160 an lo phum tawh chu tihchhiat a ni a, a tichhe palhtu contractor chuan a siam leh thuai tur an sawi a. P&E lam chuan insak hna leh kawng laih hna chu hna kal lai mek a nih avangin duhthusama electric hrui zam leh ban phun hna chu duh anga chakin an kalpui theih loh thu an sawi a. Transformer panga Department in a bun tur chu, pakhat bunfel a ni tawh a, a bak pali chu thleng thuai tura beisei a ni an ti bawk.

Zokhawsang a Assam Rifles ram hi acre 1305 a zau a ni a. Infrastructure development hna hi Package pakua a then niin contractor hrang hrang ten an thawk mek a. Engineering Projects India Limited (EPIL) hian hna te hi an tender a an vil zui bawk a ni.