Vawiin chawhma dar 11.00 khan chawlhkar hnih chhung awh Local Bal Shree Selection Summer Camp chu Vanapa Hall-ah khar a nit a a; Chief Minister Pu Lal Thanhawlan he inkhawm hi a hmanpui a; Parliamentary Secretary Pu H. Zothanglianan a tawiawm a ni. He camp hi Mizoram Bal Bhavan Society leh Social Welfare Department angkawpin an buatsaih a ni a; naupang kum 5-16 inkar 570 zet an tel a ni. Inkhawm hi Pi B. Sairengpuii, Secretary,Social Welfare Deptt. chuan a kaihruai a ni.

Pu Lal Thanhawla chuan, “Naupangten school chawlh thla khat awh zet an hman laia an talent haichhuak leh chher hriam tura Bhal Bhavan Society-in camp hlawhtling tak a buatsaih hi a ropui a; India ram mihring zawng zawng zinga zaa 40 vel zet hi thalaite leh naupangte an nih avangin an tana khawvel thar tha tak siamsak hi sawrkar leh mipuite hian kan mawhphurhna a ni tih kan hriat thar a tul a ni” a ti. Mizo hnam nunah rinawmna te, dikna te leh taimaknate a tlakhniam sawt thu sawiin Chief Minister chuan, “Mihring nun ze hlu hi naupangte rilruah a thara kan tuh a tul tak meuh meuh a; nu leh pate pawhin khawvel ropuina nia kan ngaih sum leh pai te, in leh lo ropuite ai hian vanram thlenga kan chhawm luh theih tur awm chhun kan tu leh fate hi kan ngaihsakin, kan enkawl zawk tur a ni” a ti. Bal Bhavan (Naupangte Inpui) hmun tur pawh sawrkar chuan a hriatreng thu leh Aizawl leh a chhehvelah hmun remchang tha tun maia a awm loh avanga la tihhlawhtlinsak theih loh an nih thu Pu Lal Thanhawla chuan a sawi lang bawk. “Assam Rifles-te hi contractor-te an inpeih hman chuan kumin October-November thla chhung hian Zokhawsang lamah an insuan chhuak tan ang a; kum 2012 chhunga insuan fel tir kan tum a ni. AR ram chhuahsan hi keini sawrkar chuan mimal hnenah zungkhat bawk pawh kan pe dawn lova, vantlang tan tangkai taka hman a ni ang. Sawrkarin dan hmanga a humhalh dawn bakah, mipui leh NGO te pawh AR ram chhuahsan humhalh dan turah biakrawn an ni ang” Pu Lal Thanhawla chuan a ti.

Bal Shree hi naupang zinga pianpui talent nei tha leh chawimawitlakte hnena India ram pum huapa chawimawina pek thin hming a ni a; state level camp-a titha ten zonal huap camp-ah inelna an nei leh a, chumi hnu chuan national huap camp-ah inelna nei lehin Bal Shree dawng turte hi thanchhuah an ni thin a ni. Chawimawina hi kum tin India President emaw a nupui emawin Rashtrapati Bhavan, New Delhi-ah a hlan thin a ni. Mizoram-ah chuan March 2009 khan Bal Bhavan hi a lo ding tan a; mahni puala hmunhma an neih loh avangin Khatla YMA Run-ah bul an tan a; he society-in a tum ber chu Mizoram-a naupangte talent haichhuah a, ram leh hnam tana chhenfakawm tura chher hriam a ni. Tunah hian kut themthiamna lam chi reng reng chu Electric Veng YMA Hall-ah an inzirtir thin a; hetianga khawngaihna leh duhsakna nena lo mikhual thintu Khatla YMA Branch leh Electric Veng YMA Branch te chungah Pi A. Vanlalzawni, Chairman, Mizoram Bal Bhavan chuan lawmthu a sawi.

July 19, 2011 a neih tan he Bhal Shree Summer camp chhung hian naupangten lemziak te, hluma thil siam te, thlalak te, thu leh hla phuah zirna te, science experiment chi hrang hrangte leh environment chungchangte zirin, inelnate buatsaih a ni a. Inelnaa titha lawmman 3-na thleng buatsaih a ni a; lawmmante hi Pi Lal Riliani, President, Indian Society on Tobacco & Health, Mizoram Chapter chuan a sem a ni.