Nimin tlai dar 5:30 khan Circuit House, Lawngtlaiah Lawngtlai DC Pu B. Lalhmingthanga leh Central Young Lai Association (CYLA) hruaitute an inkawm a. Inkawmna hona hun hi CYLA President Pu V. Thangzovan a kaihruai a, CYLA Gen. Secretary Pu Vanlian hrin chuan CYLA chanchin report a pe bawk.

Pu B. Lalhmingthanga chuan YMA, YLA leh MTP te hi khawtlang leh ram tana phut let nei lova in pe an ni a, thian chhanna atana thi ngam, a tul tul atana pen chhuak an ni tiin NGO pangngai anga rinluh ngawt atan a ui thin thu a sawi a. District Administration leh Voluntary Organisation te thawhhona a that loh chuan mipuiin an tuar thin tih sawiin CYLA chu ram siamthatna atana thawhpuiah a sawm a. Lawngtlai District tan theih tawpa hmalak a tum thu sawiin thawhpui atana tha ber chu CYLA nia a hriat thu a sawi a ni.

DC hian ram hmangaihtu dik tak nih a tul zia leh hmasanna atana sum kan dawnte dik taka hman anih theihna atan tanrual a tul zia a sawi a; kut tlingloa thil tih chingten hmun an chan lohna turin thawh ho a ngai a ti a. Ram siamthatna tura CYLA inpekna leh inhuamna chu a hlu tih sawiin thawkho tura a in peih thu leh tangruala infin chhuah zel a tul thu a sawi a; hmalam hunah hlawhtlinna tha tak hmuh ngei a beisei awm thu a sawi bawk a ni. DC hian CYLA hruaitute hi Independence Day lawmna atana inbuatsaihna kalpui anih dan a hrilh bawk a ni.

CYLA hi 1974, September 23 a ding niin tunah hian branch 93 an awm a, member 30000 chuang an awm bawk. CYLA hruaitute hian DC hnenah hian Lawngtlai District hmasawnna atana tul hrang hrang leh a tul a piangah DC hmanrua ni tura an in peih thu an thlen a ni.