Chief Minister Pu Lal Thanhawla chuan nizan khan Aijal Club-ah Silk atanga puan siam chhuah chawi larna pakhat, Zozia Handloom Emporium, Tlangnuam, Aizawl ina ‘Zozia Silk Fashion’ a buatsaih, model ten an entir chu a tlangzarh.

Chief Minister chuan Mizoten puan, cotton atang emaw silk emaw atanga kan siam chhuahte hi khawvelah a hniam biklo a ni a ti a. Eizawn nana kan hmanna kawngah sorkar chu a puitu chauh a ni tiin, kan rinchhan ber tur a nilo a ni a ti. Puantah hi hmeichhiate tih turah chauh dah lovin mipa te pawhin kan thawk tur a ni a ti a. Eizawnna ngialngheta siam tur hian belhchian dawl leh pawm tlakin kan siam tur a ni tiin, tunhmaa sorkar office-a parda tur kan pek angte kha a chhe lutuk a ni a ti. Chuvangin midang, ram dang mite thlenga an duh turin a siamna uluk turin a chah a ni. Chief Minister chuan hetiang Mizo kutchhuak silk puan pholanna neia, mahni dehchhuah ngei Zozia Silk in hma a la hi lawmthu a sawi bawk a ni.

Zozia Silk in silk puan siam chhuah mawi tak takte pholanna ah hian Minister of State for Sericulture, Pu NK Chakma pawhin thu tawi a sawi a. Central Silk Board atanga hotu lokal ten thusawina hun an hmang bawk a ni.

Zozia Handloom Emporium hi Tlangnuam, Aizawla awm a ni a, kum 1992 atanga bul tan a ni. Tunah hian Sualkuchi Institute of Fashion Technology (SIFT), Assam atanga thiamna neiin, Central Silk Board leh National Institute of Fashion Technology (NIFT), Kolkata te hriatpui a ni bawk a ni.