Greenwood Hospital buatsaih ‘Symposium on the Emerging Role of Surgery in the treatment of Diabetes’  tih thupui hmanga, vawiina Vanapa Hall-a neihah Chief Minister Pu Lal Thanhawla chu Khuallian a ni.
Chief Minister chuan hetiang hun pawimawh tak, mithiam leh milarte chahchhuaka, Mizo mipui te tana chhenfakawm thei tur buatsaih a ni chu, Greenwood Hospital hotute chungah  lawmthu a sawi a. Pu Lal Thanhawla chuan Mizo te hi hriselna lam ngaihtuahna  kawngah kan la hniam hle nia a hriat thu a sawi a, helamah hian kan thanharh a hun tawh hle a ni, a ti. Kan taksa hi Pathian chawimawina tur anih avangin zuk leh hmuam lamah pawh ringtute hi kan fihlim a ngai a ni, a ti. Hmasawnna lama kan lo changkan ve zelnaah hian kan ei leh in ah te kan fimkhur tawk thin lova. Chuvangin natna duhawmlo tam tak kan vei chhova. Zunthlum natna te pawh hi kan cho chhuah ni te pawha a hriat thu a sawi a ni. Sum leh pai ngah vang ringawta ei teuh teuh hian ‘mawl thau’ ah min siam a, hei hian natna tam tak a pawchhuak thin a ni a ti. Hemi anih avang hian health care lamah kan tlan chak angai a ni a ti.

Pu Lal Thanhawla chuan doctor thiam leh hmingthang Dr. Surendra Ugale, Laparascopic surgeon  leh a thawhpuite, Hyderabad-a Kirloskar Hospital’s Laparoscopic Surgery Centre,  Asia Khawmualpui-a la awm chhun, hmunah hian kan Doctor-te ngei pawh hi an zir ve theih nan ngaihtuahna hman ala ni ang a ti a. Chief Minister chuan Greenwood Hospital hmalakna hi Mizoram tan malsawmna ni turin a duhsakna a hlan a ni.

Dr. S.Ugale chuan zunthlum natna hi thunun theih, mahse tihdam theih loh anga kan hriat thin kha, tunah chuan zaia tihdam theih anih thu a sawi a. A zai dan pawh hi a verh (laparascopyic surgery ) hmanga tih anih thu a sawi bawk

Symposium neihna hun hi Dr. Lal Lawma’n a kaihruai a ni.