243/2025-2026

Saitual, the 21st April, 2025: Vawiin khan Chief Minister Pu Lalduhoma chuan ZX Eden Tamdil Lake Resort a hawng a, Mizoram Legislative Assembly Speaker Pu Lalbiakzama, Tourism Minister Pu Lalnghinglova leh Fisheries Minister Pu Lalthansanga te’n an telpui.

He hunah hian Chief Minister Pu Lalduhoma chuan thu sawiin, ZX Eden Tamdil Lake Resort neitute chuan kum 2023 atang khan tlawm takin bul an tan tih a sawi a, an thawhrim rah hmuh theia a awm chu lawmawm a tih thu a sawi. Pu Lalduhoma chuan Sawrkar department hnuaia enkawl hmun thenkhat luah tlak loh a awm thin avangin mimal enkawlna (privatisation) hnuaia awm chu a tul chang awm a ni tih sawiin, he resort pawh hian hma a sawn zawk theih nan Tourism department chuan mimal enkawl turin a hawh tir (outsource) ta a ni, a ti.

CM chuan Tamdil chu Mizoram dil neih zinga hmingthang ber pawl a ni a ti a, department pathum- fisheries, forest leh tourism hnuaia enkawl niin, Tamdil Management Committee chu DC kaihruaina hnuaiah din a ni bawk tih a sawi. Tamdil chu tha taka enkawl turin leh khualzin hip thei tura tan la turin Pu Lalduhoma chuan line department te chu a chah nghal a ni.

CM chuan ZX Eden Tamdil Lake Resort-in chhungkaw tam tak eizawnna a siamsak chu lawmawm a tih thu a sawi a, a enkawltute chu mi tam tak tana malsawmna ni tura duhsakna hlanin, theih tawp chhuah zel turin a fuih nghal a ni.

Kum 2020 khan ZX Bamboo and woodworks te chuan thing leh mau hmanga inchhung bungrua siamin bul an tan a, kum 2023 July atang khan Tourism privatisation scheme hnuaiah Tamdil Lake Resort hi kum 15 chhung an enkawl dawn a ni.

Vawiin ZX Eden Tamdil Lake Resort hawnna hun hi Pi R. Lalrodingi, Director, Tourism dept chuan a kai hruai a, Chief Minister Pu Lalduhoma chuan thu sawiin a hawnna hun a hmang nghal a ni. ZX Eden Tamdil Lake Resort neitu Pi Ronghilhloi chuan inlawmna thu a sawi a, MLA Speaker Pu Lalbiakzama, Tourism Minister Pu Lalnghinglova leh Fisheries Minister Pu Lalthansanga te pawhin thu sawiin, Saitual Bawrhsap Dr. Lalngura Tlau chuan lawmthu sawinain hun a khar a ni.