Mizoram State Compensatory Afforestation Fund Management and Planning Authority (CAMPA) Governing Body chu vawiin khan Chief Minister’s Office Cabinet Room-ah Chairman Pu Lal Thanhawla, Chief Minister kaihhruaina hnuaiah meeting pawimawh tak neih a ni.

CAMPA thil tum ber chu Environment & Forest department enkawl ramngaw te hmasawnna hnathawh project hrang hrang, tuikhuah, motor kawng, mining, industry din nan te leh a dangte avanga tihchhiat te siam that (afforestation) a thingphunte leh a thawm that hna leh tul dang tam takte siam thar leh compensatory a ni a. Heng project hrang hrangte hi thawh anih theihna turin Forest (Conservation) Act hmanga Union Ministry of Forest & Environment in forest clearance state sorkar rawtna angin a pe thin a. Forest reserved ram tihchhiat manah a hmangtu department ten sorkar rate angin man an chawi thin a, chu chu state sorkarin central sorkar Adhoc CAMPA ah an chhunglut ve leh thin a ni. State tinin compensatory afforestation te, ramngaw humhalh nan te,ram tih chereu siam that nan te,infrastructure siam nan te, ramsa humhalh leh a ven nan te leh hetiang lam reng reng bawhzui nan Adhoc CAMPA ah hian sum an mamawh zat tur ruahmanna a thelut ve leh thin bawk a ni.

Vawiina meeting-ah hian CAMPA Mizoram CAMPA hmalak tawhna te thlirletnate neiin, sum hman tawhte leh la mamawh tur chungchangte an sawiho a ni. State CAMPA Governing Body hnuaiah hian Chief Secretary Chairman na hnuaiah Steering Committee a awm a, chumi hnuai lehah chuan PCCF Chairman na hnuaiah Executive Committee a awm leh a ni.

Meeting-ah hian Finance Minister Pu Lalsawta, Environment & Forest Minister Pu Lalrinmawia Ralte, Chief Secretary Pi L.Tochhawng, PCCF & Principal Secretary to Chief Minister Pu Lalram Thanga, Finance Commissioner Pi L.N.Tochhawng leh E&F department official te an tel a ni.