Directorate of Health Services chuan hetiang hian thuchhuah an siam.Bekang eisual vang ni a rin mi pathum laiin nunna an chan thu-ah leh hemi nghawng kal zelah mi engemaw zatin insawiselna an neih avangin heng an harsatna te enfiaha a tul anga hma la turin Directorate of Health Services atangin Integrated Disease Surveillance Programme (IDSP) te chuan nimin (19.6. 2014) khan Bungtlang South an thleng a.
IDSP Team te hi State Nodal Officer Dr. Pachuau Lalmalsawma hovin an thawkchhuak a, Lawngtlai CMO, Pu Thangkima'n a tawiawm bawk.Media hrang hrangah te pawh tarlan tawh angin Bungtlang South khua-ah hian May ni 9, 2014 a bekang zawrh eitu te zinga mi pathum te chuan nunna an chan a. Heng nunna chante bakah hian bekang eitu mi engemaw zat ten an taksa-ah insawiselna hrang hrang an la neih avangin an natna te zirchiang a, a tul anga enkawlna kalpui turin IDSP hotute hi an thawk chhuak ta a ni. Anni kaihhruaina hnuaiah hian Bungtlang South PHC-ah Mobile Health Clinic neih zui nghal a ni a, Lawngtlai Civil Hospital atangin Dr. Lalmalsawma , Dr.Lalduhsaka leh staff te bakah Dr.Jimmy. Lalnunpuia Bungtlang PHC leh staff ten damlo te hi a thlawnin an en nghal a ni. Bekang ei sual ni a inhria mi thahnem tak te pawh an natna lanchhuah dan te ngun taka zir chian niin a tul anga enkawlna pek nghal an ni a, he hunah hian Bungtlang South leh a chhehvel khaw hrang hrang atangin Damlo mi 232 te enfiah an ni a, Malaria, pumpui lawng, zunkawng leh thawk lama harsatna, rannung seh leh natna dang engemaw zat hmuhchhuah an ni a, enkawlna pawh a theih anga kalpui nghal a ni bawk. IDSP hotute hian mitthi chhung te pawh tlawh nghalin mitthi te chanchin chiang zawka zawtfiahin an ral nghal bawk.
Hemi ni vek hian medical team te hian Bungtlang South Village Council, NGO hruaitute bakah Kohhran hrang hrang hruaitute nen boruak tha tak hnuaiah inkawmhona hun an hmang a, he hun hi Dr. Thangkima CMO, Lawngtlai in kaihruaiin Dr.Pachuau Lalmalsawma, Nodal Officer, IDSP chuan mipui lam atanga zawhna te a chhang a, mipuite chu thlaphang lo tur leh chi-ai lo tur leh thu belhchian dawllo leh rintlak loh te avanga mangang lo tura a duh thu a sawi. Lawngtlai CMO Dr.Thangkima pawhin a bialchhung a nih anga an manganna te a hnena thlen zel tur leh theihtawp chhuahpui a inhuam reng thu a sawi bawk.
IDSP te chuan Bungtlang South mipuite harsatna enfiah dan tur chungchangah ruahmanna felfai taka kalpuitu Pu Lal Thanzara, Health Minister leh Dr. K.Ropari, Principal Director Health & Family Welfare Deptt chungah lawmthu an sawi a, phur leh thatho taka anmahni lo dawngsawngtu Bungtlang South Village Council, NGO leh Kohhran hruaitute chungah leh anmahni tawiawmtu Dr. Thangkima, Lawngtlai CMO & Staff te chungah lawmthu an sawi bawk a ni.
