Chief Minister & Chairman, State Planning Board Pu Lal Thanhawla kaihhruaina hnuaiah vawiin khan NLUP Conference Hall-ah State Planning Board Meeting neih a ni.

Meeting-a thuhma a sawiah Pu Lal Thanhawla chuan central sorkarin ‘resource allocation’ kalphung an thlak danglam avang leh 14th Finance Commission rawtna kalpui anih tak avangin ‘development finance’ ruahman dan pawh a danglam nasa hle a ni a ti a. Kumin hi ‘year of consolidation’ atan hman a, sum dinhmun a that zawk theih nan ruahmanna siam a tul dawn a ni a ti a. Hemi kawngah hian a tul ang zelin sorkar hotute duhdan tawiawm turin official hotu liante chu a hriattir a ni.

Chairman chuan Union Budget provision atanga sum state sorkarin a sawkchhuah thin Central Sector Scheme (CSS), Central Sector Major Programmes leh 10% Gross Budgetary Support for North Eastern Region te hi zirchian a, a tam thei ang ber sawkchhuah thiam a tul dawn a ni tiin, heng atana Union Budget Provision 2015-16 zirchiang a, Central sorkarin Revised Budget Estimates a siam hma ngeia ruahmanna pawm tlak central sorkarah thehluh a tul dawn tih department hotute chu a hrilh a. August thla chhung ngeia department tinten umzui theuh turin a hriattir nghal a ni.

Chief Minister chuan ram hmasawnna chak zawka kalpui tur chuan kan hnathawh danah leh sum kan hman danah mumal zawka kal a tul tiin tum mumal (focus), hlawhtling taka thawh dan tur (strategy) leh thawh chhuah tur bituk (target) neia hna thawh a ngai a ni a ti a. Kalphung pangngai pet peta kal tum mai lova, a hlawk thei ang ber leh ram economy tana nghawng nei tha thei ber tur zawnga hmala turin department hotute chu a fuih a. Kan thlen chin atang zela hmasawn tur kan ni tiin, ‘tuna kan kal dan hi ala tha tawk’ ti mai lova, ngaihtuahna thar nen hmalam kan pan zel tur a ni a ti.

Sorkarah mithiam thahnem tak an awm tih sorkarin a hria tiin, Pu Lal Thanhawla chuan ram hmasawnna chak zawka kalpui anih theih nan theihtawp chhuah leh zual turin chung mithiamte chu ngenin, technology lama hmasawnna leh thiamna thar chhuak zel te hi hmang tangkai thiam turin a chah a ni. Pu Hawla chuan ram tana kan thawh thenkhatte hi ram tana phurrit a awm thin thu sawiin, compensation sum duh luat vanga hnathawh kal hlei theilo tam tak awm thin chu pawi a tih thu a sawi a. Neitu rilru dik tak pu a hna kan thawh chuan harsatna a pumpelh thei a ni a ti.Kan hnathawh dan leh ruahman danah ram hmasawnna atana thahnemngai taka thawkin, kan thiamna leh finna a tha zawnga hmang tangkai turin kalkhawmte chu a sawm a. Meeting hian rah tha tak a neih ngei a duh tih Pu Lal Thanhawla chuan a sawi bawk a ni.

Meeting-a agenda an sawiho tlangpuite chu central ministry hrang hranga project thehluhte pawm leh sanction anih theihna tura ruahmanna mumal tak siam te, heng project hrang hrang central sorkara thehluh dan leh a bawhzui dan tur te, heng rawtna project thehluhte hi mumal taka kalpui leh project thehluhte a concept note buatsaih chungchangte an sawiho a ni.

Meeting-ah hian Mizoram State Planning Board Memberte, Minister te, Secretary te leh Department hotute sawm an nih angin an tel tha hle a ni.