Chief Minister Pu Lal Thanhawla chu kum 72 a tling ta. Vawiin hi a pianchampha phak a ni a, a office a thawk zawng zawng ten a office conference hall-ah lawmpuina thingpui buatsaihin Pu Lal Thanhawla hian a Birthday Cake a zai a ni.

A birthday rawn lawmpuitu thahnem tak zingah Prime Minister  Dr.Manmohan Singh chuan tukin zing khan telephone a rawn lawmpuiin, hun lokal zel turah hlawhtlinna a dawn zel theih nan duhsakna a rawn hlan a. Dr.Mammohan Singh chuan  Pu Lal Thanhawla kaihhruaina chak tak hnuaiah Mizoram chuan langtlang sorkar, fel leh fai leh dik an neih ngei a beisei tlat thu a sawi a, Mizoram mipuite chu hmasawnna duhawm tak nei turin duhsakna a rawn hlan nghal a ni.

Chief Minister Pu Lal Thanhawla chuan Prime Minister berin a chunga rinna a nghat chu lawmthu hrilhin,  theihpatawp a chhuah ngei ang tiin a chhanglet a. Chief Minister chuan Prime Minister in NLUP a thlawpna leh a tuipuina avangin lawmthu a hrilh bawk a ni.

Chief Minister Pu Lal Thanhawla hi mi tam zawk chuan vawiin hi a kum 68 na turah kan ngai a, amaherawhchu amah ngeiin vawiin, a pianchamphaphak hi kum 72 a tlin kum anih thu a sawi a ni.