NLUP Apex Board Meeting vawi 3 -na chu vawiin khan Tourist Lodge, Chaltlang-ah Chief Minister Pu Lal Thanhawla kaihhruaina hnuaiah neih a ni a. NLUP kalpui dan tura hriat tur tul, a nihphung (concept), a thil tum (philosophy) leh a hlawhtlina tur kawng (roadmap) te zirhona neih a ni a. Hlawhtling taka kalpui a nih ngei theih dan turte sawihona neih a ni  bawk a ni.

Meeting hi Board Chairman Pu Lal Thanhawla'n a kaihruai a. Thuhma a sawiah Chief Minister chuan NLUP hi programme tha tak, Central-a mithiamte pawh in a tha an tih anih thu sawiin a kalpui dan turah mithiamte kutah an innghah thu a sawi a. Chuvangin a  hlawhtlinna hi a dawngtute bakah a enkawltu mithiamte kutah thui tak a innghat a ni a ti. NLUP hi mi chanhaite leh kuthnathawktute khaichhuahna mai anih loh thu sawiin, Pu Hawla chuan ramngaw kan tih chereu tawhte siam tha leh theitu, nungcha leh thing leh mau leh hnim te humhalh a, boruak tha hip tur siam theitu tur anih thu te a sawi a. A kalpui leh sem hun thu ah a dawng turte rilru leh dawnthleng ala kawih em avanga, uluk taka zir la ngai anih thu a sawi a.Hmanhmawh taka sema hlawhchham ai chuan muangchanga kalpuia hlawhtlinpui kan duh zawk a ni tiin, tuna a dawng turte rilru en hian kan sem lawklo chu a lawmawm hle zawk a ni a ti. Kan inpeih tlan hunah kan sem ang tiin, central lam pawhin hman an duh ve avangin kan hlawhtlinpui ngei ngei tur a ni a ti a. Kan hlawhchham chuan kan mualpho mai nilovin, Lal Isua Krista Hmel kan tibal ang tih kan hlau a ni a ti.

NLUP Implementing Board Chairman Pu R.Selthuama chuan kan inpeih tlan vek hunah NLUP chu kalpui tan a ni ang a ti a. A thawhkhatnaah chhungkaw 24,000 hnenah tanpuina pek anih tur thu leh chumi zawhah chuan MLA Constituency zelah chhungkaw 600 hnenah, Aizawl District chhung amite chu chhungkaw 400 hnenah tanpuina pek an ni ang a ti.

Meeting ah hian agenda hrang hrang zirhona leh sawihona neih anih bakah NLUP chungchang ah Power Point Presentation hmangin Pu P.L.Thanga IAS (Rtd.),Vice Chairman,NLUP Implementing Board leh Dr.R K Lianthanga, Project Director & Member Secretary, Mizoram Remote Sensing Application Centre (MIRSAC) ten hrilhfiahna an nei bawk a ni.

Meeting-ah hian Apex Board member te bakah a bik taka mi sawmte an kal kim hle a ni.