New Delhi-a cham mek Chief Minister Pu Lal Thanhawla chuan vawiin chawhma khan Prime Minister Dr. Mammohan leh United Progressive Alliance (UPA) Chairperson Pi Sonia Gandhi te a hmu.

Chief Minister Pu Lal Thanhawla chuan Prime Minister hnenah hian Mizoram sorkarin Non Plan hnuaia sum harsatna a neihte chu sutkian sak turin a ngen a. Dr.Manmohan Singh chuan rampum sum harsatna hre reng chunga Mizoram sum harsatna chu chingfel turin theihtawp alo chhuah tur thu a hrilh a. Mizoram sorkar flagship programma NLUP ah Integrated Land & Water Management telh a ni chu tha a tih thu sawiin, a programme pumpui tih a hlawhtlin ngeina turin theitawp chhuah anih tur thu Chief Minister hi a hrilh bawk a. Dr.Manmohan Singh hian Pu Lal Thanhawla chu tun inthlana sorkarna siam thei dinhmuna a inhlangkai chu a lawmpui thu a sawi bawk.

Prime Minister a hmuh zawh hian Pu Lal Thanhawla chuan UPA Chairperson Pi Sonia Gandhi hmu lehin, state dang inthlan zawh takah hnehna an chan theih loh laia sorkar siam theia chakna an chang chu a lawmpui thu alo hrilh a. Sorkar chak leh tha tak, langtlang sorkar kalpui zel turin duhsakna Pu Hawla chu a hlan a. Mizoramin sum lama harsatna a neihte chu lo enpui a, a sutkian dan tur lo ngaihtuahpui a tum thu hrilh bawkin, Finance Minister pawh lo biakrawn anih tur thu a sawi bawk a ni.

Chief Minister Pu Lal Thanhawla hian Union Minister for Commerce Pu Anand Sharma pawh a hmu a. Zokhawthara Land Custom Station la hawn loh chungchang sawipuiin, nakum 2014 chhung ngeia hawn theih anih tur thu Commerce Minister hian Chief Minister hi a hrilh a ni.

Chief Minister hian Union Minister for Power Pu Jyotiradiya Madhavroa Scindia pawh hmuin Tuivai HEPchungchang an sawi dun a. Chief Minister chuan Power Project dang pawh siam zel anih theih nan project ala thehluh belh zel tur thu Power Minister hi a hrilh a, Pu Scindia chuan theihtawp lo chhuahpui zel a tiam a ni. Chief Minister hian Pi Kumari Selja, Union Minister for Social Justice & Empowerment hmu bawkin a ministry a thil tih theih awm ang ang chu Mizoram tan ti zel ang tiin, sorkarna siam thei a chakna an hmu chu a lawmpui thu sawi pahin a hrilh bawk a ni.

Chief Minister hi Pu T.P.Khaund, Principal Adviser to Government of Mizoram leh Pu Lalram Thanga, Principal Secretary to Chief Minister ten an tawiawm a ni.