Chief Minister Pu Lal Thanhawla leh Mizoram Univeristy-a International Seminar neih mek hmang tura lo kal Bangladesh Sawrkara State Minister for Water Resources Pu Muhammad Nazrul Islam te chuan nimin tlai khan Chief Minister Bangla-ah inkawmhona hun tha tak an nei.

Chief Minister Pu Lal Thanhawla chuan India Independence hmain Mizo te chhuahka ber chu Chittagong, Cox’s Bazar leh Rangamati te anih thu hrilhin luidunga inkalpawhna chu tha thar nen kalpui tha a tih thu Bangladesh Minister a hrilh a. July thlaa Shillonga buatsaih Hmarchhak bial leh thenawm ramten lui leh lui dung te hman tangkai dan sawihona ‘Nadi 2016’ ah pawh luidung leh a kaihhnawih te chu sawiho niin he sawihona atangin inlaichinna tha zawk a pianchhuah ngei a besei thu te a hrilh a. Kaladan Multi Modal Project chungchang sawiin he Project a taka tan anih hunah Bangladesh pawhin a hlawkpui ngei a rin thu leh mipuite tan eizawnna leh hmasawnna lama kawng tam zawk a hawn ngei a beisei thu te Minister hi a hrilh bawk.

Bangladesh Sawrkara State Minister for Water Resources Pu Muhammad Nazrul Islam chuan Chittagong Hill Tracts te chu hawn zau zel anih mek thu te leh hnam tlem zawkte hmasawnna chu Bangladesh Sawrkarin a ngaihpawimawh thu te a sawi. Hmarchhaka hmasawnna te hi Bangadesh leh mipui ten engtin nge hlawkpui leh an tangkaipui ve thei ang tih hi Bangladesh Sawrkar chuan a thlir reng a ni, a ti a. Prime Minister Sheikh Hasina chuan India leh Hmarchhak state te nena insumdawn tawnna chungchang chu a dah pawimawh thu Chief Minister hi hrilhin ramri a insumdawn tawnna atan Border Haat a tam thei ang ber din anih theih ram pahnih ten a tul ang te chu chak taka an bawhzui a tul thu te a sawi bawk. India nena lui intawm chungchanga engmah harsatna a awm lo chu a lawmawm a tih thu sawiin hei hian kan inlaichinna a that zia a ti lang a ni, a ti.

Nizan khan Chief Minister hian Bangladesh Minister leh sawmbik te pualin zanriah a buatsaih sak a ni.