Urban Development & Poverty Alleviation (UD&PA) Department buatsaihin vawiin khan Aizawl khawpui chhunga bank hrang hrangte tan ni khat awh Credit Linked Subsidy Scheme (CLSS) under PMAY leh Self Employment Programme (NULM) zirhona chu NLUP Conference Hall-ah neih a ni.

CLSS hi Pradhan Mantri Awas Yojana (PMAY) - Housing for All (Urban) hnuaia component pakhat niin Central Sector Scheme a ni a. He component hnuaiah hian Housing Loan angin In thar sakna emaw, In siamthatna leh zawm belhna emaw, Bank (PLI) kaltlangin pekchhuah a ni ang. Bank (PLI)-te kaltlangin Interest Subsidy 6.5% a pek tur a ni a, loan hi nuai 6 thleng subsidy tel in a lak theih ang. Nuai 6 aia tam la duh tan nuai 6 chung lam zawngah interest subsidy a awm tel tawh lo ang. CLSS hnuaiah hian HUDCO leh NHB (National Housing Bank) te hi CNA (Central Nodal Agency) niin, an ni kaltlang hian Ministry of Housing & Urban Poverty Alleviation chuan Interest Subsidy PLI a pe in, a programme a vil ang a, a endik bawk ang.

He component hnuaiah hian EWS (economically weaker section) leh LIG (low income group) loan a dil theih a. EWS ah hian kum khata cheng nuai thum aia tlem la lutte chuan 30sq metre aia te lo in sak nan nuai 6 thleng a dil theih a. LIG ah chuan kum khatah cheng nuai thum atanga nuai 6 la luttuten in sak nan cheng nuai 6 aia tam an dil thei ang. Hmeithai, pianphunga rualbanlo awmna chhungkua, transgender, manual scavenger, SC, ST leh OBC te duhsak bik an ni ang.

Deendayal Antyodaya Yojana-National Urban Livelihoods Mission (DAY-NULM) hi Ministry of Housing and Urban Poverty Alleviation hnuai a sawrkar laipui flagship programme niin September ni 24, 2013 atangin India ramah kalpui tan a ni a. Mizoramah pawh UD&PA in District capital pariatah NULM hi a kalpui mek a ni. NLUM hian sawrkar laipui in a hun rei tak a lo kalpui tawh SJSRY chu siam tha in a rawn thlak ta a ni. He scheme hnuaiah hian SEP hi component pawimawh ber pakhat a ni a, SEP loan in a tum bulpui ber chu khawpuia mi retheiten eizawnna bul an tan theihna tur a a pung lem a bank loan pek a ni. Hemi hnuaia loan reng reng hi interest rate 7% aia a tamna zawng sawrkarin a tum sak dawn a ni.

SEP hnuaiah hian mimal sumdawnna te nau din duh tan cheng nuai hnih thleng loan a dil theih a.Mi 5-10 intelkhawm emaw Self Help Group te tan cheng nuai 10 thleng loan a dil theih a ni. SHG bik tan chuan Self Help Group-Bank Linkage hnuaiah an sum khawl zat atanga chhut a a let li thleng ema a aia tam emaw pawh loan hi dil theih a ni bawk.

He workshop-ah hian resource person Pu Daniel Lalawmpuia, State Mission Manager, UD&PA; Joseph Darrothanga, SDS, UD&PA leh Lalrimawii Khiangte, Asst.General Manager, HUDCO te chu resource person an ni.