Vawiin khan Chief Minister Pu Lal Thanhawla chu a bangla ah Hmarchhaka BSNL hotu – Pu Kamal Kumar Saxena, ITS, Chief General Manager, BSNL NE-I Circle leh a thawhpui dangten an hmu a, Mizorama mobile phone leh internet services chungchang sawiin hemi tihchangtlun nan a BSNL hmalakna te Chief Minister an hrilh a ni.

Chief Minister Pu Lal Thanhawla chuan tunlai khawvel thang zelah inbiakpawhna telecommunication chu thil pawimawh ber, thil dangte pawh a chunga innghat a ni a, mahse tun dinhmunah kan telecom infrastructure te hi duhthusama tha anih loh avangin mobile phone leh internet services chungchangah ramchhung hmun dangte kan phak lo hle a ni a ti. Pu Kamal Kumar Saxena chuan BSNL in Mizoramah a dinhmun leh an service pekchhuah te tichangtlung tura hma an lak mek dante Chief Minister a hrilh. BSNL chuan hlawkna um vak lova mipui rawngbawl hna leh mipui tana thawh leh public leh social services pek chu an ngaihpawimawh ber a ni tiin hemi kawngah hian chak leh zawka mipui tan an thawh zel thei nan an khawl leh bungrua ah te entry tax awlsak turin a ngen a ni.

Chief Minister chuan Bangladesh kaltlanga Mizoramin International Internet Gateway Service a chhawr thei hun tur leh tuna a dinhmun leh Internet muang lutuk leh inbiak laia call tawp thin call dropping na chhan te hi BSNL hotupa a zawt a. Heng zawhnate chhangin Pu Kamal Kumar Saxena chuan Bangladesh kaltlanga Hmarchhak pumpuiin internet inthlunzawmna chak zawka a neih theih nan tuipui chhunga submarine cable line hman tangkai nan Agartala ah a ruhrel tur bunfel tawh niin Agartala leh Guwahati chu thlunzawm a ni tawh a, he line hi Mizoram pawhin a chhawr thei nan Aizawl leh Guwahti inkar a 10 Gbps line pakhat chu siam mek a nih thu leh tun thla tawp lamah he hna hi zawhfel beisei a nih thu a hrilh a. Hemi bakah hian hetiang line chak dang pathum chu Aizawl leh Shillong inkara siam turin hma lak mek a nih thu a hrilh bawk. Hengte hi peihfel a nih hunah chuan internet services te chu tun aia tha leh chak zawk a nih a beisei thu a sawi a. Call drop chungchangah chuan tower dahbelh an tum leh tower awmsa te hi tha taka enkawl a ngaih thu tarlangin hei hi an tih theih chuan call drop chu a ziaawm a beisei thu a hrilh a. Kum 2016-17 chhunga Mizorama hma lak an tum dan tarlanna Development Plan chu Chief Minister a pe bawk a ni.