‘Improvement of Various Junction inAizawlCity’ chungchang vawiin khan UD & PA Minister Pu Zodintluanga hovin ama Office ah sawiho a ni. Aizawl khawpui kawng pengthuam leh kawngpui thenkhat zauh a siam mam dan tur leh khawpui tih mawi dan tur te ngunthluk taka sawi ho a ni a. PHE, PWD, Power & Electricity, BSNL, Traffic Police, UD & PA, AMC a hotu leh aiawh te meeting ah hian an tel a ni.
‘Improvement of Various Junction in Aizawl City’ chungchang sawihova member te thutkhawm vawi khatna ah hian, Mizoram khawpui ber Aizawl khawpui siamthaa cheimawi tur hian hun rei tak atanga ngaihtuahna senga hmalak anih dan leh hmun thenkhat te phei chu a hmunhma ngei enfiah hovin lo thlithlai lawk tawh a nih dan Pu Zodintluanga chuan sawiin tunah hian Bawngkawn, Hunthar, Republic (Pi Pangi Peng) leh Dawrpui-a Hospital hnuai Thana peng te hi hmalak hmasakna tur atana chhawpchhuah an niin, hnathawh na tur atana ruahman Rs. 6.5 Crore pawh a hmin tawh avangin hnathawh vat a ngai a ni a ti a. Heng tarlan hmun te bakah hian Aizawl khawpui chhunga hmun dang pawh ruahmanna ah hian telh an ni a, chungte pawh chu remchan dan anga la kalpui zel tur an nih thu Minister chuan a sawi bawk.
Aizawl khawpui kawng pengthuamte zauhva siam rual anih chuan khawpui hmel pawh a lo danglam in mipui tan pawh chhenfakawm tak a ni dawn a, a landan leh sawi mai aiin sut kuak tur leh hnathawh tan hma hauh atanga chinfel tur a tam a ni tih hrereng chunga hmalak anih chhoh dan UD & PA Minister chuan meeting ah hian a sawi fiah a. Kawng siamthat leh cheibawl a nih lai hian kan kawngte a chep hlawm avangin mipui tana harsatna awm lo thei ang ber tur ngaihtuah ni se, hna pawh hi furpui zawh veleh kumin November thla atanga hnathawh tan ni thei se a duhthu a sawi a, chumi atana lo inbuatsaiha hma lo la tur leh harsatna emaw, sukukna emaw a awm anih pawha amah hrilh turin department hotute chu a hrilh a. Hemi ruahmanna hi tluang taka a kal theih chuan Aizawl Khawpui chu a zauvin a nuam hle tawh tura a beisei thu Minister chuan a sawi bawk.
Kawngpengthuam te leh khawpui chhung thuam mawi hna leh a tawt lai siam rual thawk tur hian meeting chuan PWD chu hna bul tan hmasa tur leh a tul dan anga PHE, P&E, te pawh tui pipe leh pipe leak lo enfiah leh hrui zam enfel te, BSNL leh TV Cable operator ten hruizam enfel leh senghawi dan tur te leh midang te pawh in bul tan ni se ti a rel a ni a. Department hrang hrang aiawh officer kalkhawm te chuan hmalak dan tur atana tha an tih leh an ngaihdan te an sawiho nghal a ni.
