Krishi Vigyan Kendra (KVK) Lawngtlai chuan vawiin (04.08.2016; ningani) chawhma dar 11 khan KVK Training Hall-ah zirna bansan tawh thalai (school dropout)-te tan an theihna hman tangkai dan tur zirtirna (training on capacity building of rural youths) a buatsaih.

He hun hi KVK Senior Scientist & Head Dr Michelle C. Lallawmkimi'n a kaihruai a. Thalaite fuihna thu sawiin, mi tin hi hlawhtling thei vek kan ni a; taimakna, thawhrimna leh teirei peihna kan tlakchhamna hian beidawnnah min hnuk lut thin zawk a ni, a ti.

KVK-a Scientist (Agricultural Extension) Pi Sheela Tayeng chuan thalai rual mi 30 hnenah training a pe a. He training-ah hian thalai rualte chu anmahni intun nun theihna tur leh intodelh theihna tur kawngte zirtir an nih bakah, sawi hona hun hlawkthlak tak hman a ni a. Huang hrang pathum - thil siam (carpentry), lo/huan neih leh ran vulh lamah te Self Help Group din nghal a ni bawk.

He hun hi Chawnhu Village Council member-te tawiawmna hnuaiah hlawhtling taka neih a ni.