Nimin tlai khan Chief Minister Pu Lal Thanhawla chu a chenna inah Chin Civil Society Network aiawh thalai rual mi 18 ten an hmu a, Mizoramah Sawrkar leh civil society te inkara thawhhona leh inpuihtawnna tha tak an ral hriat thin chu a tak in an hmuh thu an sawi a, ropui leh fakawm an tih thu an sawi bawk.

Chief Minister Pu Lal Thanhawla chuan kumin April thlaa Myanmara Chapchar Kut hmanga a zin chuan Mizoram mipui leh Myanmar a cheng Zo hnahthlak te inkara inunauna leh inlaichinna nghet leh thuk zawk a thlenna kawngah rah duhawm tak a chhuah ngei a beisei thu sawiin kawng hrang hranga thawhhona tha tak a awm theih nan hma a lak dan te a hrilh a, Chin State Chief Minister pawh Mizorama zin tura a sawm thu hrilhin a lo zin vat ka beisei a ni, a ti a. Thalai te chuan Mizorama tlawmngai pawl hrang hrang YMA, MHIP leh MZP ten nen inkawmhona tha tak an neih thu sawiin Mizoram University pawh an tlawh thu an hrilh.

Chief Minister chuan Myanmara Kalay University leh Mizoram University ten thawhhona nei thei se tiin Kalay University Rector pawh a titipui thu sawiin zirlai te intlawhpawhna leh cultural exchange neih chu thil tha tak leh hlawkthlak tak nia a rin thu a sawi bawk. Chin Civil Society Network palai te chuan an rawn zinnaah hian Mizoram leh Chin state inkara in unauna leh inlaichinna tha intan naah an ngaih thu an sawi a. CYMA in felfai taka an zinna programme an duansak naah lawmthu sawiin khaw hrang hranga YMA Branch ten an lo dawnsawnna chuan an rilru a khawih tak zet thu an sawi bawk.

Chief Minister hi ngaihhruina thilpek an hlan bawk a ni.

Chin Civil Society Network palai 18 te hi Myanmar Chin state chhunga Township 9 – Hakha, Mindat, Paletwa, Leptanchawng, Falam leh hmun dang ami te an nia.