Tukin zing khan Chief Minister Pu Lal Thanhawla chu Vanilla buaipuitu French company Eurovanille India aiawhte – Chief of Production Pu Nicolas Lebas Jean Francois leh Agronomist Project Manager Pi Mathilde Baudean leh All Mizoram Farmers’ Union (AMFU) General Secretary Pu Zion Lalremruata leh a thawhpui dang ten a chenna in ah an hmu a. AMFU hmalaknaa Mizoram loneitute ten Vanilla an chin theih nan Eurovanille India an thawhpui dante an hrilh hre nghal a ni.

Chief Minister Pu Lal Thanhawla’n AMFU in loneitute hamthatna tur ngaihtuaha French company nen thawhhona thuthlung an ziak leh hmalakna an neih tum dante chu lawmawm a tih thu sawiin AMFU te hmalakna a hlawhtlin ngei nan Sawrkarin theihtawp a chhuah tur thu AMFU aiawhte a hrilh a. Eurovanille India aiawhte hian India hmun danga hmalakna a nei mekte leh an thawh dante sawiin Hmarchhak ah hian Vanilla a that duh avangin hmalakna an neih tum dante sawiin Guwahati bulah a sawngbawlna factory pawh bun an tum thu te an sawi bawk a ni.

AMFU leh Eurovanille India hian kumin January khan Agriculture Minister hriatpuina in loneitute Vanilla an chin theih nan thawhhona thuthlung an ziak a. AMFU aiawhte sawi danin Lunglei ah Pilot project ti hmasain a hnuah Mamit leh Kolasib District ah pawh he project kalpui tum a ni a ti a. Ruahmanna awm ang chuan Vanilla kung hi Kuhva kungah zam tir tur a ni a. He company hian Mizoram loneitute tan Vanilla kung 30,000 an pe dawn a, a rahte chu anmahni in an lei vek dawn a ni. AMFU aiawhte Sawrkarin Buyers and Sellers Meet a buatsaih chu an hman tangkai thu sawiin hemi kaltlangin Citronella leh Lemon grass te chu contract farming anga kalpui turin hma lakna neih mek thu an sawi bawk.