Ni 27-30 March 2017 chhunga North East Region Rashtrapati Scouts & Guides Testing Camp, State Training Centre, Tanhril-a neih chu vawiin tlai khan a kharna neih a ni a, Aizawl District Deputy Commissioner Pu Kannan Gopinathan, IAS-in a hmanpui.

Pu Kannan Gopinathana chuan state hrang hrang atanga kalkhawmte chu traininga an zir ang taka midang tanpui tura thatchhuah chhunzawm zel turin a chah a ni. Rashtrapati Award Scouts & Guides Testing Camp N.E.Region kharna inkhawm hi Dr Lalbiakmawia Ngente, Hqrs Commissioner (S) i/c Rover Sec.-in a kaihruai a, Assam, Tripura, Meghalaya, Mizoram leh NF Railway atangin Scouts & Guides 114 an lo kal thei a, National Headquarters aiawhin Birendra Chingakhan, Regional Organising Commissioner (Scout), Regional Headquarters, Guwahati chu Scout Section ah Leader of the Camp a ni.

Rashtrapati Award (National Award) Testing Camp-a kal tur hian Scouts & Guides Advancement 4 - Pratham Sopan, Dwitiya Sopan, Tritiya Sopan leh Rajya Puraskar te an pass vek a ngai a, Testing Camp ah hian an pass tawh zawng zawng leh Rashtrapati Syllabus nen exam an nei leh a, chuta hlawhtlingte chuan Rashtrapati Award an dawng thei chauh a ni.

Rashtrapati Award hi India rama Scouts & Guides te Award dawn theih sang ber a nia, he Award dawngte hi Rahtrapati Bhawan ah President-in Badge leh Certificate a hlan thin a ni.