3211/2023-2024

Dated Aizawl, the 3rd January, 2024: Vawiin tlai khan Chief Minister Pu Lalduhoma chuan External Affairs Minister of India, Dr. S. Jaishankar chu Delhi a a pisaah a kawm a. Mizorama Myanmar Refugee awm mekte chungchang leh thil pawimawh dangte an sawi dun.

Pu Lalduhoma leh External Affairs Minister of India Dr. S. Jaishankar te hi Indian Civil Service batch khat (1977 batchmate) chhuak an nih avangin an inthian tha hle a. Inpawh takin Myanmar ram atanga raltlan Mizorama lo lutte chungchang leh Myanmar sawrkar dinhmun an hmuh dan te an sawi dun a ni. Chief Minister chuan, "tuna India leh Myanmar ramri kan hman mek, British sawrkarin a siam hi keini Mizo hnahthlakte tan chuan barhluih ramri a ni a, unau min then hrang a, hmasang ata tawha kan hnam leh kan ram min tidarh a. Chuvang chuan he ramri hi kan pawm thei lo", tiin zofaten pawm harsa an tih thu a hrilh a. Hnam khat kan nih avangin rorelna pakhat hnuaia awm theih ni se tih hi kan duh dan leh thlir reng a ni, a ti. Sawrkar laipuiin Myanmar nena kan inrina hi hung a tum a nih chuan British sawrkarin min barh luih zofate thendarhtu ramri hi a pawm tihna a ni dawn a, chu chu keini chuan tha kan ti thei lova, kan pawm thei dawn lo a ni, a ti bawk.

Dr. S. Jaishankar hian Chief Minister hi a lawmpui tak zet thu lo hrilhin; a kaihhruai sawrkar kal zelna turah duhsakna a hlan a.

Chief Minister hian Dr. S. Jaishankar te nupa hi Mizorama zin turin a sawm a ni.