3210/2023-2024

Aizawl, the 3rd January, 2024: Vawiin chawhnu dar 1:00 khan Sports & Youth Services Minister Pu Lalnghinglova Hmar chuan MINECO-a a office chamber-ah Jeremy Lalrinnunga'n IWLF National Weightlifting Championship 2023-2024 a gold medal a lak lawmpuina hun a buatsaih.

Sports Minister Pu Lalnghinglova Hmar chuan Jeremy Lalrinnnunga hlawhtlinna a lawmpui thu sawiin, National level-a champion nih chu thil harsa tak, thawhrimna leh tumruhna nen chauha thlen theih a ni, a ti a. Sports chu 'quota' tel miah lova Mizote'n India rama a ber kan nih theihna langsar a ni tih sawiin, sports category hrang hranga result tha lehzual nei turin infiammite chawikan leh association thuam chak kawngah hma lak a nih tur thu a sawi bawk.

Indian Weightlifting Federation (IWLF) buatsaih National Weightlifting Championship 2023-2024, 28.12.2023 atanga ni 08.01.2024 thleng awh tur Senior (Men) 67 kg category-a gold medal latu Jeremy Lalrinnunga pawhin thu sawiin, inhliam vanga duh anga training a kalpui tha thei lo chunga gold medal a la chu a lawmawm zual bik thu a sawi a. A inhliam chhung zawnga fuiha tiphur thintu Mizoram Weightlifting Association hruaitute chungah lawmthu sawiin, a kalzelna turah Mizoram Sawrkar, Association hruaitute leh mipuite tanpuina leh thlawpna a ngen bawk a ni.

Vawiina Sports Minister-in Jeremy Lalrinnunga gold medal lak lawmpuina hun a buatsaihah hian Jeremy Lalrinnunga nu leh pate bakah Weightlifting Association hruaitute leh Sports & Youth Services Department hotute an tel a ni.