No.7804/2020-2021

Dated Aizawl, the 16th March, 2021: Tukin khan Chief Minister Pu Zoramthanga chu a pisa ah Ministry of Health & Family Wefare hnuaia Food Safety and Standards Authority of India (FSSAI) Chairperson Rita Teaotia, CEO Pu Arun Singhal leh thawktu dangten an hmu a. Mizoram mipuiin ei tur thianghlim leh hrisel zawk an neih theihna tura hmalak ho dan tur an sawiho.

Chief Minister chuan mipuiin ei tur thianghlim an neih a, hriselna atana thalo ei leh in, zuk leh hmuam do a ngaihpawimawh thu a sawi a. FSSAI nen inngheng hnai zawka an thawh dun a, state mipui hriselna atana an theihtawp an chhuah pawimawh a tih thu a  sawi a. State chhunga ei tur tharchhuah leh siamchhuah bakah state pawn leh ram pawn atanga chawk luh te chu a him tawk em tih chik zawka enfiah a tul thu a sawi.

FSSAI hotute chuan Mizoram chhungah chak zawka hna an thawh theihna tura hmalak ngai te Chief Minister hnenah an thlen a. FSSAI chuan ei leh in thianghlim mai bakah ei tur dik, taksa hriselna mipuiin an ei theih a, natna hrang hrang laka him tlan theihna tura Eat Right India initiative an kalpui mek chungchang te an sawipui bawk.

Chief Minister an hmuh zawh hian FSSAI hotute hian Health & Family Welfare Minister Dr. R. Lalthangliana an hmu leh bawk a. H&FW Special Secretary Pu R. Lalramnghaka leh Project Director Dr. F. Lallianhlira te an tel bawk a ni.