No.7805/2020-2021

Aizawl, 16th March, 2021 : Parliament Session kal mekah vawiin khan Mizoram Rajya Sabha M.P Pu K.Vanlalvena chuan Zero Hour ah thu sawiin Myanmar ram buaina avanga Mizorama raltlan te chungchang a sawi chhuak a. Ministry of Home Affairs chu Myanmar atanga raltlan te himna turin a tul anga an kalphung her danglam turin a ngen.

Pu Vena chuan Myanmar ramah democracy tungding a, mihring dikna leh chanvo humhim tura beitu te chungah rawng taka sipaite chetna avanga Mizoram lama rawn tlan chhia mi 300 chuang an awm thu House ah hian sawi chhuakin hemi zinga 150 vel zet chu Myanmar police a thawkte an ni a ti a. Heng mite hi Mizoram sorkar leh Mizo mipui, pawl hrang hrang ten lo kuangkuahin sorkar laipui hriatpui lohvin an lo tanpui a ni, a ti a.

Hetih lai hian Ministry of Home Affairs chuan Myanmar ramri depa awm hmarchhak state 4 Chief Secretaries te chu Myanmar atanga lo tlanchhia te lo dawngsawng lo tura rawn hriattirin ramria duty Assam Rifles te chu Myanmar lam atanga ramri kana lo tlanchhe tur te lo dang kir turin a hriattir bawk a.

Myanmar atanga lo tlanchhia te lo dang kir tura India sawrkar-in a ti hi Mizo mipui te chuan an hrethiam dawn lo tih sawiin Pu Vena chuan Myanmar atanga lo tlanchhia te chu Mizote hnampui, Mizo chi leh kuang te an ni a, tih hlum tur atana thawn kir chu mihring nihna atanga ngaihtuah pawhin thil tih chi a ni lo, a ti a. Myanmar ram buaina a ziaawm a, boruak a ralmuan hma loh chuan in thawn kir chi a ni rih lo, tiin India ram chu khawvela democracy ram lian ber a nih angin mipui rorelna democracy tung ding tura beihna reng reng chu thlawp leh tanpui hi India ram in a tih awm tak a ni, tiin House ah hian a sawi a.

Khawvel pumin heng Myanmar raltlan te hi lo hum tura India mipui te min beisei laiin Ministry of Home Affairs hian Myanmar raltlan te chungchang hi ngun taka ngaihtuahin a kalphung thlak danglam se, tiiin House ah hian a ngen nghal ani.