4905/2025-2026

Dated Aizawl, the 18th March, 2026: Vawiin khan Pu Lalduhoma, Chief Minister chuan IWD Organizing Committee, State Hub for Empowerment of Women (SHEW), Directorate of Women & Child Development-te buatsaih, International Women’s Day 2026 lawmna hun chu Dawrpui Multipurpose Centre-ah khuallian niin a hmanpui a. He hunah hian Pi Lalrinpuii, Minister, Social Welfare, Women & Child Development Department chu khualzahawm a ni bawk.

Khuallian Pu Lalduhoma chuan kalkhawmte chu Women’s Day chibai a buk a. Mizote chu hmakhawsang atanga hmeichhiate dinhmun dah hniam ve lo tia sawi theih kan ni tiin, an chan chhiatna lai ber nia lang thin, ‘mak chhiat’ an tawh chang emaw, ‘sum chhuah’ emaw-ahtea dinhmun chhe taka an awm thin chu, sawrkarin The Mizo Marriage & Inheritance of Property (Amendment) Bill, 2026 a pawm tak hmangin,  dinhmun tha zawk leh zahawm zawkah a hlangkai tih a sawi a. Sawrkar lai mek chuan hmeichhe MLA pathum lai a neih bakah Mizorama Cabinet Minister-a hmeichhia dah hmasa ber sawrkar a ni a, a thatzia chu hnam dangte pawhin hmuhpuiin, ‘Women Icon Award’ an pe hial a ni, a ti.

Chief Minister chuan mipa leh hmeichhe tih tlan theih leh nih tlan theih china tehin Mizoram chu India rama hmeichhiate dinhmun that berna state zinga mi a nih a rinawm thu sawiin, he dinhmun kan thlen theih chhan chu thil tam tak karah kan hnamzia vang te, kan sakhuana vang te leh MHIP leh hmeichhe pawl hrang hrangte hmalakna vang a ni, a ti a. Mizo hmeichhiate chu eizawnna kawngah pawh sawrkar hna sang mai piah lamah sumdawnna lamah leh entrepreneurship lamah te rilru puitling tak puin, a tlem emaw a tam emaw, eng emaw tal lo thawkchhuak ve theia awm an tum hram hram thin tih a sawi a. Hmeichhiate hmasawnna ram a nih avangin khualzinte pawhin an rawn ngaihven a, an sawi darh mek a ni, a ti.

CM chuan sawrkar kal laiin hmeichhiate a ngaihsakzia lanna pakhat chu an flagship scheme Bana Kaih-ah a ni tiin, CM Special Package Pilot phase-ah mi 2255 zinga 985 chu hmeichhia an ni a; CM Special Package Phase II, tun hnai lawka sem chhuahah mi 458 zinga 211 te chu hmeichhia an ni a; Phase II hnuaia dilna approved tawh, la sem chhuah si loh 397 awm mek zinga 196-te chu hmeichhia an ni a; Loan Component lamah pawh pilot phase-a loan sanction tawh 394 zinga mi 119 te chu hmeichhia an ni a, Phase II-a loan sanction tawh mi 10 zinga 4 hmeichhia an ni, tih a tarlang a ni.

CM Pu Lalduhoma chuan WCD hnuaia kalpui, central sawrkarin hmeichhiate hamthatna leh venhimna lama hmalaknate sawi langin, a hlawhtlin theih nan sawrkar pawh a tang hle a ni, a ti a. Hmeichhiate chunga hleihlenna reng reng chu report turin mipuite a chah a, sawrkarin a tih tur a ti zel ang tih a tiam bawk. Mizoram chu hmeichhiate leh naupangte tana ram ralmuang taka kan siam theih chuan kan ram leh hnam kan chawimawi dawn a ni, tiin, vawiina hmeichhe chawimawite chu a lawmpui thu a sawi a. Mizo hmeichhiate chu anmahnia theihna ropui tak awmte hmanga ram leh hnam tana bei zel turin a sawm a ni.

Khualzahawm Pi Lalrinpuii pawhin thu sawiin, hmeichhiate’n chanvo an chan theih reng, duhsakna an chan loh avanga an chunga tla lo tam tak a awm laiin, Chief Minister chuan Cabinet Minister atan hmeichhia ruatin, hmalakna hrang hrangah kaihruaiin, mamawh a thlente a tihhlawhtlinsak thin tih sawiin, lawmthu a sawi a. WCD chu hmeichhe hotu hruaina tha hnuaiah thawhhona tha an neih avangin hmalakna chak takin an kalpui thei a ni, a ti a. Kumin Women’s Day chu a ni takah lawm ni thei lo mah se Mizo nunphung chawisangin mi chanhai zawkte tanpui nan te, dam lo kan nan leh bai insuahtawn nan hman a nih thu a sawi a. IWD thupui angin dikna, rorelna dik leh hmalakna te chu hmeichhia leh naupang zawng zawng tan a ni tih hre thar a, an hmeichhe nihna hmang tangkai a, midangte tanpui nana mawhphurhna la thar turin kalkhawmte a sawm a, Women’s Day chibai a buk a ni.

Vawiin hunah hian NGO hrang hrangte, kohhran hrang hranga hmeichhe pawlte, Mizoram State Commission for Women (MSCW), Women’s Study Centre MZU, pavalai/mipa pawl, Mizo hmeichhe Padma Shri dawng tawh – Pi B. Sangkhumi leh Pi K.C. Runremsangi te, Zakapa Award dawng tawh – Dr. Lalrinawmi leh Pi Khawlrinpuii te, Pi K Thansiami, ex-MLA te leh midangte an tel a. Pi Lalzarmawii, Commissioner & Secretary, SW & WCD-in kaihruaiin, kalkhawmte lawmna thu a sawi a. Pi Zoramthangi Chhangte, Director, WCD-in kumin IWD thupui hmangin thu a sawi a. Mizoram chhunga hmeichhiate dinhmun leh an harsatna tawh thinte a tarlang a. Mizo mipate an thih nasat avangin kan ramah hmeithai/single mothers-te tana welfare scheme neih a pawihmawh thu sawiin, ram leh hnam, khawtlang hmasawn nan hmeichhiate chawikan a ngaih thu a sawi a ni. (A presentation-a statistics langsar zual thlalak angin dah a ni.)

Minister Pi Lalrinpuii’n Women Icon Award a dawn lawmpuina pawl hrang hrang aiawha hlan a ni a. Hlantute chu:

1. WCD aiawhin Pu Lalduhoma, Chief Minister, Mizoram

2. Dr Lalrinawmi Ralte, Zakapa Awardee 2023

3. Pi Khawlrinpuii, Zakapa Awardee 2025

3. Dr. Jane R. Ralte, President, All Mizoram Women's Federation

4. Pi Lalengthangi, Secretary, Aizawl Area BKHP Coordination (BKHP)

5. Pi Zomuanpuii Ralte, President All Mizoram Elected Women Representatives

6. Pi Zorinpuii Khiangte, Treasurer, Mizo Hmeichhe Tangrual

7. Territorial Home League Secretary, Salvation Army Territorial Women Ministries

8. Pi Lalhmingliani Hmar, President, YWCA

9. Pi Lalngaihzuali, President, Indian Christian Women's Movement: Mizoram

Kawng hrang hranga Mizo hmeichhia hlawhtlinna changte hnenah lawmpuina hlan niin, (attached file) Pi Vanlalnuntluangi, Miss Grand International, 1st Runner Up, 2025 kaihhruaiin IWD Pledge chham a ni a. Pi Lalliani, President, MHIP-in lawmthu sawiin hun a khar a ni.

Hmeichhe hlawhtlingte chawimawina hunah hian Pi Lalrinpuii, Minister chuan Mizo Hmeichhia, All India Services-a thawkte hnenah hlanin, Pi Lalzarmawii, Commissioner & Secretary chuan Sports lam leh entawntlak khawpa hlawhtlingte (Exemplary Female Achievers) hnenah a hlan a; Pu Lalduhoma, Chief Minister chuan STEM (Science, Technology, Engineering & Mathematics)-a tithate hnenah a sem a, Pi Prova Chakma, Member of Legislative Assembly chuan Gender Role Breakers (hmeichhe hna anga ngaih ngai loh thawkte) hnenah semin, Pi Zonunthari, Joint Secretary chuan Exceptional Women (Mizo hmeichhia mi bikte) hnenah a hlan a ni.

International Women's Day Committee, February ni 19, 2026-a Social Welfare, Women and Child Development Minister Pi Lalrinpuii kaihhruaina hnuaia thukhawm chuan International Women’s Day (IWD) vawi 115-na chu March ni 8 (Pathianni)-a a tlak avangin, vawiin, March ni 18 (Nilaini)-ah official function neih turin a lo rel tawh a. Kumin International Women’s Day thupui chu GIVE TO GAIN tih a ni a - Mizo tawng chuan PEKIN LUKHAWNG A NEI tia lehlin a ni.