4904/2025-2026

Aizawl, 18th March, 2026 : Vawiin chawhma dar 10:00 khan UD&PA Minister Pu K. Sapdanga chuan Aizawl West Outlet Project hna thawh tan tur a khuh hawng. Aizawl West Outlet Project hi Dinthar atanga Tuikual South inkara Tuikual lui leh a hrula kawr siam leh a chunga motor tlan theihna tur siamna tur a ni. 

Aizawl West Outlet Project hna thawh tan tur khuh hawnna inkhawmah hian khuallian Pu K. Sapdanga chuan thu sawiin, khawtlang thawhhona tha tak avang leh mimal thenkhat, an chenna in thiah then ngai hial te bakah, ram pek ngai ten phal taka an pek avanga he hna hi tan theih tur a peih a lo ni ta chu lawmawm a lawmawm takzet a ni a ti a. UD&PA hmalakna hrang hrang lungphum leh hna zawh tawh hawn te tunhnaiah an ngah thu sawiin, heng hna hrang hrang hlawhtlinna atan hian Sawrkai lai mai bakah, hun hmasa lama hruaitu hmasa te'n hmathlir an lo neih that zar te pawh an zo tih a sawi bawk. Minister hian he project hi a hlawhtlin ngei theih nan hun rei tawh tak atangin Aizawl West-II bialtu MLA Pu Lalnghinglova Hmar chuan thahnemngai taka a bawhzui avangin tun hun hi kan lo thleng ta a ni a ti. 

Khual zahawm bialtu MLA leh Minister of State ni bawk Pu Lalnghinglova Hmar chuan he project hlawhtlin theih nana an hmalakna hrang hrang te a sawi a. Aizawl West Outlet Project atana sum an neih chuan helai hna pum hi a daih dawn loh avangin, kawng hi laklawh deuhin a tawp dawn a, chumi chhunzawmna atan chuan UD&PA in Storm Drain Project an neih nena tangkawpin, Dinthar atanga Tuikual 'A' mual thleng tuiluankawr siamin, a chungah motor tlan theihna tur siam a ni dawn tih a sawi a, he kawng hian Dinthar, Tuikual North leh Tuikual South chuanhnuai te tan kawng pawimawh tak leh chetvel awlsam phah nan te, rikrum thilah pawh rang taka han chet vel nan a tangkai dawn hle a ni a ti. Pu Lalnghinglova Hmar hian a ngenna ngaipawimawha an tih hlawhtlin sak avangin UD&PA Minster Pu K. Sangdanga leh department official te chungah lawmthu a sawi a. Bialtu MLA hian he project atana thahnemngai taka thawktu khawtlang hruaitu hrang hrang te hnenah lawmthu sawiin, khawtlang hmasawnna dah pawimawh hmasa a an ram te phal taka petu chhungkaw engemawzat te zara he project hi thawh theih a lo chhuak ta a ni tiin lawmthu a sawi bawk. A ram phal taka petu Pu Sangthanga Tuikual South, ground survey neih ni taka che suala nunna hial a chan chu pawi a tih thu leh a tawrhpui thu a sawi bawk.

He hna hi SASCI atanga thawh tur a ni a. Project pahnih kaih kawp niin sum sen tur zawng zawng hi a vaiin cheng vaibelchhe 30.96 a ni. He hna atana Project Management Consultant chu ARDECO Design Build niin contractor pahnih Zothan Consultancy Services leh Studio Hamlet ten a hna hi an thawk dawn a ni. RCC hmangin drain tha tak siam tur niin chumi chungah chuan metre 4 a zau motor tlanna tur leh metre 1.5 a zau footpath te siam tur a ni a, a vaiin 1.68 km a thui a ni dawn a ni. He kawng hi Dinthar YMA ram hrula intanin Tuikual lui a zawh chho ang a, Tuikual A muala CT Turning point ah a chhuak ang. 

He Project hawnna inkhawm hi UD&PA Comissioner & Secretary Pu Lalmalsawma Pachuauin kaihruaiin Pu Jacob Lalawmpuia, Director UD&PA in Technical Report a pe a.  Pu CC. Lalchhuangkima Addl. Secretary UD&PA in lawmthu a sawi bawk.