Nimin tlai khan India rama UN Agency International Fund for Agriculture Development (IFAD) palai, Country Representative Pi Rasha Omar leh a thawhpui midang 10 ten Chief Minister Pu Lal Thanhawla chu a chenna in CM Bangla ah hmuin, IFAD in Mizorama hmalakna an neih tum dan chungchang an sawiho a ni.

Chief Minister Pu Lal Thanhawla chuan IFAD in Mizoram leh Nagaland ah te hlawk zawk leh boruak(environment) ti chhe zawng tlangram lo neih dan enkawlna tha zawk duanga hma lak an tum chu lawmawm a tih thu IFAD palai hrilhin tih tur la awm te chu a rang thei ang bera tihfel sak turin a ngen a. Nakum January thla vela tan tur he project hi Mizoram Sawrkar leh loneituten a nghakhlel hle tih a sawi bawk. IFAD palai Pi Rasha Omar chuan Hmarchhakah IFAD in kum 25 hma lam khan hna thawk tanin tunah hian a vawikhatna atan Mizoram leh Nagaland a thawhpui dawn a, state pahnih atanga thil in zirtawna, tlangram loneih dan tha zawk an ruahman chhuah ngei a beisei tih sawiin he project hnuaia hma lak tum dan tlangpui a hrilh bawk a ni.

IFAD Team te hi he project Design Team niin Project in a huam tur District pali – Champhai, Mamit, Kolasib leh Serchhip tlawhin leh tul dang te tiin Mizoramah kar hnih dawn hun an hmang dawn a. He project kum 6 daih tur hian tlangram loneih dan bung leh peng hrang hrangte zirin loneituten hlawkna leh hamthatna hrang hrang te a fuankhawm dawn a ni.