Vawiin khan Mizorama kuthnathawktute dinhmun zir chiang tur leh hemi chungchanga hmalakna hrang hrang ngaihven turin International Fund for Agriculture Development (IFAD) Design Mission Team member 11 te Aizawl an lo thleng. Kar hnih chhung cham tura Mizoram lo zin International Fund for Agriculture Development (IFAD) Design Mission Team member-te chuan vawiin chawhnu khan Secretariat Conference Hall-ah Mizoram sawrkar hnuaia Department hrang hrang hotute an kawm nghal a. Inkawmhona hi Chief Secretary Pu Lalmalsawman a kaihruai a ni.
Chief Secretary chuan International Fund for Agriculture Development (IFAD) aiawhte Mizoram hmasawnna atana project ngaihtuah tura an rawn zin chu lawmawm a tih thu a sawi a. IFAD leh Mizoram sawrkar in thawhhona tha tak an neih chhoh theih nan Mizoram sawrkar hnuaia Department kaihhnawih ten theihtawp chhuah a, implementation fimkhur leh chak taka kalpui a nih tur thu kalkhawmte chu a hrilh a. Pu Lalmalsawma chuan IFAD leh Mizoram sawkar tangkawp te tum ber chu Mizoram chhunga mirethei te dinhmun chawikan, ramngaw leh nungcha humhalh, kuthnathawktute tharchhuah hralh na tur (marketing) ngaihtuah leh ei leh bar lama intodelh te a ni a ti.
Meeting-ah hian Vice Chairman, NLUP Implementing Board and Member Secretary, State Planning Board Pu PL Thangan Mizoram Integrated Agriculture, Natural Resource Management and Livelihood tih thupui hmangin Powerpoint Presentation-in project duan mek chu a hrilhfiah a. Project hian Mizoram chhunga District 4 - Serchhip, Champhai, Kolasib leh Mamit chhunga block 11 a huam dawn a, Mizoram chhunga lo hal thin (jhumming cultivation) chu kalsan a, lo neih dan ngelnghet zawk leh tharchhuah sawngbawl (food processing), hralh na tur hai chhuah (marketing) leh a phur chhuah nan kawng tha neih lama hmalak chu sawrkar thil tum anih thu a sawi.
International Fund for Agriculture Development (IFAD) hi United Nations (UN) hnuaia specialized agency niin kum 1977 khan din a ni a, kum 30 chuang India ramah retheihna umbo a nih theihnan hna an lo thawk tawh a ni. IFAD India hotu Pi Rasha Omar, Country Representative for Asia and Pacific Region leh Pi Meera Mishra, Country Coordinator te chu November 2016 khan sawrkar hotute leh NGO te kawm turin zan khat riakin an rawn zin tawh a ni. Tun tum ah IFAD Design Mission Team member loKal te chu:
1. Ms. Rasha Omar, Country Representative in India.
2. Ms. Meera Mishra, Country Coordinator.
3. Mr. Sreekantha Shetty, Team Leader Design Mission Team.
4. Mr. Sriram Subramaniam, Programme Analyst.
5. Dr. Virendra Pal Singh, Agronomist & Agro Forestry.
6. Mr. Edward Mallorie, Deputy Mission Leader.
7. Mr. Claudio Mainella, Financial Management Division.
8. Dr. Venkatesh Tagat, NRM Specialist.
9. Ms. Barbara Jordan Vincente, Economist.
10. Dr. Ajender Negi, Livestock Expert.
11. Mr. Pratul Dube, Financial Management Specialist.
IFAD aiawhte hi Mizoram ah 6th April 2017 - 19th April 2017 chhung an cham anga, 7.4.2017 hian Kolasib District, Mamit District, Serchhip District leh Champhai District te tlawh tura chhuah an tum a, an khaw tlawhah Village Council hruaitute, kuthnathawktute leh NGO hruaitute kawm bakah Mizoram sawrkar Department hrang hrang hmalakna te an en dawn a ni. 10th April 2017 ah Aizawl rawn let leh a sawrkar Department hotute kawm zui zel an tum a ni.
Vawiin meeting-ah hian Finance Department, Planning & Programme Implementation Department, Agriculture Department, Horticulture Department, Commerce and Industries Department, Fisheries Department, Soil & Water Conservation Department, AH & Vety Department, UD & PA Department, Soil & Water Conservation Department leh Sericulture Department hotute bakah All Mizoram Farmers Union (AMFU) leh Bamboo Development Agency (BDA) aiawhte an tel a ni.
