Vawiin khan Health and Family Welfare Minister Pu Lal Thanzara chuan Govt. T. Romana College Silver Jubilee lawmna Vanapa Hall-ah a hmanpui.
Pu Lal Thanzara chuan Govt. T. Romana College- in kum 25na an thleng thei chu lawmawm a tih thu sawiin silver jubilee thleng thei tura hna lo thawh tawh zawng zawng te thlirleta lawmthu sawina hun anih bakah thlen chin atanga hmasawn zel tura hmalakna hun anih thu a sawi a. Zirlaite chu nakina ram hruaitu tur an ni tiin an zirnaah tih takzeta hmala tur leh ram leh hnamin a chhawr tlak ni turin a fuih a. Rilru fim tak pu a college ti hmingthatu nih tum theuh tur leh thangthar te tana he college hi malsawmna anih zel theih nan theihtawp chhuah theuh turin zirlai leh zirtirtu te Pu Lal Thanzara chuan a fuih a.
Health Minister chuan India ram state zingah HIV/AIDS vei tamna ber dawttu kannih thu leh he natna a hluar zel chu pawi a tih thu a sawi a, thalaite chu hmeichhiat mipatna ah in vawnga nun uluk turin a chah a. He natna do kawnga MSACS, khawtlang hruaitute leh kohhrante hmalakna tawiawma thawhpui turin thalaite a sawm a. Mizoram chu India ramah Cancer vei tamna ber pawl anih thu Health Minister chuan sawiin meizuk chu Cancer thlen tu anih thu leh a hnam ang pawha kan lo hrisel zawk nan zirlaite chu an nun uluk tur leh zuk leh hmuam laka fihlim turin a chah bawk a. Mizo nunzemawi dikna, rinawmna leh taimakna tungding zel chunga an college motto “Service to Mankind” chu tihlawhtling turin Pu Lal Thanzara chuan silver jubilee lawmnaa kalkhawmte a chah bawk a ni.
Govt. T. Romana College hi kum 1992 a din niin National Assessment and Accreditation Council (NAAC) chuan Grade B a pe a. Tun dinhmunah zirlai 980 leh thawktu 54 an awm a. Silver Jubilee lawmna inkhawm ah hian Principal Dr. Lalrintluanga pawhin thu sawiin, Dr. Malsawmliana Secretary Organising Committee in report kimchang a pe bawk a ni.
Govt T Romana College hian an silver jubilee denchhen in Chite lui tihfai hnatlang te lo nei tawhin, thisen unit 171 Aizawl Civil Hospital -ah an pe bawka. Indian National Fellowship Centre nen tangkawpa “National Integration and Medical Camp” an buatsaih ah Free Medical Camp Tachhip-ah leh Republic Vengthlang ah te an lo nei tawh bawk a ni.
