East Tuipui Bialtu MLA Pu T. Sangkunga chuan vawiin khan SCERT leh Mizo Hlakungpui Mual Committee tangkawpin an buatsaih Liandala leh Siamkima chanchin zirchianna State Level Seminar Khawbungah a hmanpui.
Seminar hawnna thuchah sawiin Pu T. Sangkunga chuan Siamkima leh Liandala te’n Zofate tana rohlu min hnutchhiah dan leh anmahni chanchin pawh ngaihnawm tham a niin an tu leh fate thlengin mi chhuanawm an nih thu a sawi a ni.
Mizo Hlakungpui Mual Committee leh SCERT-te chuan Hlakungpuia sengluh tawhte chanchin zirchianna kalpui mêkah Hlakungpui dincham denchhenin Liandala hla leh Siamkima kutchhuakte chu tun tuma seminar-a zirchian atan hian an thlang a ni. Khual zahzawm leh Hlakungpui din kuma sûl lo sutu zing ami Pu M. Sawmliana, (Assistant Conservator of Forest retired) chuan Hlakungpui din tantirha an hmalaknate sawiin Seminar hi a hmanpui thei bawk a ni.
Chawhma hunah Seminar hi Higher & Technical Education Pu R. Lallianzuala’n a kaihruai a, “Liandala Chanchin” tih Pu Lalzuithanga, Associate Professor, Govt. Hrangbana College in ziah leh “Liandala hlate zirchianna” tih Pu Ngurthansanga Sailo, Asst. Professor, Govt. J.Buana College, Lunglei buatsaih chu zirho a ni a. Chawhnu lamah Pu PL Liandinga’n Seminar chu kaihruaiin, “Siamkima Chanchin” tih Dr. KC Vannghaka, Govt Aizawl College buatsaih leh “Siamkima thuziak zirchianna” tih Pu C. Lalsiamthanga, Govt. Champhai College buatsaih ngaihthlak chhunzawm leh a ni. Seminar chhim tur hian Govt. Aizawl North College, Govt. J. Buanga College Lunglei leh Champhai DIET atangin zirlai leh zirtirtute bakah thu leh hla lama tuimi thahnem tak an tel bawk a ni.
