3201/2023-2024

Dated Aizawl, the 30th December, 2023: Vawiin khan Chief Minister Pu Lalduhoma chuan a pisaah Indian Oil Corporation Limited Retail Sales, NE General Manager Pu RK Sahab leh a thawhpuite nena inkawmna an nei a. Mizoram Oil Depot a ranglama neih dan tur an rel.

Chief Minister chuan, Brig. T. Sailo hun laia an lo buaipui tan tawh Mizoram Oil Depot chu vawiin thlenga a taka kan la neih loh avangin kan mamawhna a sang hle a. Ramria innghirnghona a awm chang te, kawngpui dangtu awm changte, khuarel chhiatna avanga kawngpui a pin chang tein mipuiten harsatna kan tawk fo thin. Hetiang harsatna kan tawh thin hi rang taka chinfel thuai kan duh a ni, a ti.

General Manager Pu RK Sahab hian a ram tur hmun remchang a awm phawt chuan hma an lak nghal theih tur thu Chief Minister hi a hrilh a. Khawvel thang chho zelah a remchan chuan Rel hmanga phurh thlen theihna hmun a that ber thu leh a zim berah ram Acre 25 a zau tal a tul thu te, mihringin an chim lutuk lohna hmun a that thute an sawi a ni.

Chief Minister hian a ram tur dap kawngah harsatna a awm loh a beisei thu sawiin Supply Minister a rang lama lo sawipui tur thu a hrilh a ni.

Pu RK Sahab hi Pu Himanshu Sharma, Division Head, Silchar leh Pu Kuldip Sharma, Mizoram Retail Sales Head ten an tawiawm a ni.