Vawiin chawhma khan Chief Minister Pu Zoramthanga leh India rama Japan palai Pu Kenji Hiramatsu chu CM Bungalow ah inkawmin Mizoram leh Japan thawhhona hna thawh mek leh thawhho zel dan tur te an sawi dun.

Japanese Ambassador chuan Mizorama hna kal mek an neih, National Highway 54 Aizawl-Tuipang kawng siam te leh JICA (Japanese International Cooperation Agency) hnuaia agriculture lama intodelh tura hmalakna te chu kalpui zel a nih tur thu a sawi a. Chief Minister chuan mau hmanga Mizoram hmasawn leh intodelhna hnathawh theih dan tur sawipuiin, Ambassador Pu Hiramatsu pawh chuan tha tihpuiin, chumi atan chuan mithiamte inbe tawn se a ti.

Mizoram leh Japan chu khuarel chhiat tawk fo thin an nih ve ve thu sawidun in, Japanese Ambassador chuan heng khuarel chhiat laka inven leh lo inpuahchah dan hun rei tak an lo zirchian tawhna te leh technical resource te chu Mizoram in a hman tangkai ve theih dan Chief Minister a sawipui a. Ram pahnih inlaichinna a lo that zawk zel nan mihring chengte intlawhtawn theih nan programme siam thin tha a tih thu Japanese Ambassador chuan sawi tel in, Mizoramah pawh chutiang atan chuan kawng dap theih ni se tiin Chief Minister hnenah chuan thlenin, Japanese zir duhte tan class hawn chungchang te an sawidun a ni.

Japanese Ambassador hi Mizoram a lo kal vawi khatna niin, India hmarchhak state hrang hrangte a tlawh kual a. Vawiina Chief Minister nen an inkawm zawh hian thutharlakhawmtute nen an inkawm leh bawk a ni. Pu Kenji Hiramatsu hi Pu Takuma Kajita, Counsellor (Economic), Embassy of Japan, New Delhi in a tawiawm a ni.