Vawiin hian Pu Robert Romawia Royte, Minister of State for Tourism, SYS, etc., chuan Tuichangral South Group YMA Conference vawi 46 na vantlang inkhawm, Lungchhuan Community Hall ah buatsaih chu khuallian niin a hmanpui.

Khuallian chuan thusawiin, Tuichangral chu Zoram mi chhuanawm tam tak lo chhuah tawhna, hlang deuh taka zofate chenna hmun ani a, a hming ringawt pawh hian lung a tileng a ni. Tin, YMA General Conference lo awm leh tur N. Vanlaiphaiin a thlen dawn vanga rawn tlawh hmasak tulin ka hria a, YMA Conference leh Tourism hi awmze nei taka kalkawp tir theih nia hriatna te a lo awm bawk nen ka rawn kal ta ani, tiin an sawmna a tihhlawhtlin chhan a sawi a. YMA chu kum bithliah te, kohhran leh kawng danga inthliarna awm lohna pawl anih avangin a hlu hle a. NE India a State hrang hrangah te hna ka lo thawk kual tawh thin a,an hnam kalphungte pawh phak ang tawkin ka lo zir ve thin. YMA anga pawl tangkai leh hlu hi a vang hle a ni, a ti. Thalaite chu tum sang tak leh rilru paukhauh tak nei tura fuihin zirna leh hriatna hi mihring chakna hnar a ni a, i ngaihlu deuh deuh ang u, a ti bawk. Chutihrualin zirna lama kan lo thleng sang vaklo a nih pawhin hnual nan hman tur ani chuang lova. Khawvelah hian zir sang lo sumdawnna leh thilsiam lama hlawhtling sawi tur hi an tam em em tih hriain, ram mipuite mamawh sumdawnna lam kawngah penchhuak ngam ila, sawrkar hna chauh beisei lovin tan ila thar ang u, a ti ani. Pu Robert Romawia Royte chuan, he sawrkar hian ram mipuie tawiawmna tha leh tawngtaipuina a mamawh tih sawiin kan ramin hma a sawn zel theih nan in thawhpuina ka ngen che u ani, a ti a ni.

Minister hian Group YMA Conference thlengtu Lungchhuan Games & Sports te chu Jersey set, Football, Volleyball leh net te a pe a. Lungchhuan khawtlangin an mamawh an dilte pawh theihtawp chhuaha a ngaihtuah sak tur thu a hrilh bawk ani.

He inkhawm hi Pu R. Lalremkunga, President Group YMA in a kaihruai a. Pu C. Thanmawia Hmar, Secretary, Group YMA chuan report a pe a ni. He group huam chhungah hian Branch 19, Joint YMA 1 awmin member awm zawng zawng hi 9803 niin an zinga 5595 hi mipa an ni a, hmeichhia hi 4208 an awm ani. Life member 213 awmin hruaitu hlun chawimawina dawng tawh 80 an awm bawk. Kum kal ta chhung khan an member 59 an boral ani.

He conference hi 5th March zan atangin an nei tan a, zanin hian a tiak dawn a ni.