615/2022-2023
Aizawl the 24th May, 2022: Chief Minister Pu Zoramthanga chu vawiin tlai khan JICA India hotute leh JICA Tokyo aiawh lo kalte chuan a chenna CM bungalow ah hmu in Mizorama an hmalakna te an sawipui. Environment, Forest and Climate Change Minister Pu TJ Lalnuntluanga leh Bamboo Development Board Vice-Chairman Dr. K. Pachhunga te pawh an tel a ni.
Pu Akemine Kengo, Sr Representative of JICA India Office leh a kaihruai JICA team te chuan Mizoram a hmasawnna hna hrang hrang thawh mek leh thawh zel dan tur te an sawi a. Mizoram sawrkarin economy tih hmasawnna kawng chi khat atana bamboo development a thlang chu thil hlawkthlak thei tak nia an hriat thu an sawi a. Kawng a awm phawt chuan JICA chuan tuna hna an thawh mek bak a dangah pawh Mizoram puih an inhuam thu an sawi a ni.
