614/2022-20234
Ṭomir thla ni 24, 2022: Dan bawhchhiatna leh pawi khawihna thlengah kutzia leh finfiahna (forensic evidence) zawn leh lak a ṭul changin forensic team mamawhna a sang hle a. Mizoramah Forensic Science Laboratory pakhat chauh a awm avangin leh Aizawla awm a nih avangin chuti ang hunah chuan hmun hla zawk Lawngtlai anga forensic team lo kal turin harsatna tam tak a awm ṭhin a. He'ngte avang hian Lawngtlai District Police Force chuan Forensic Team hran nei tura hma lain, nimin (23.05.2022) khan Lawngtlaiah District Police Forensic Team chu din fel a ni.
Lawngtlai District Police-in Forensic Team hran a neih theih nan hian thawktu pathum ASI Albert Lalramthianghlima, H/C F. Lalrokhuma leh C/ David Lalrosangpuia te chu Forensic Science Laboratory, Aizawlah training tura tirh niin, pawi khawihna hmuna kutze thla lak dan te, finfiahna dang lak dan leh forensic science te an zir a. Training ṭha taka an zawh hnuah Lawngtlai DEF puala Forensic Team hi din niin, hna thawhna atana an hman tur mobile forensic vehicle buatsaih fel sa pawh nimin khan tlangzarh nghal a ni.
Forensic Team dinna leh lirthei tlangzarhnaah hian Lawngtlai SP Pu Rakesh Paweriya, Addl SP Pu C. Lalruatkima, SDPO Pu Beimosia Lapi leh Forensic Team member-te bakah, thawktu dangte an tel a ni.
Lawngtlai District Police te'n rang zawk leh chak zawka hnu chhui hna an thawh theih nan Forensic Team hi ṭangkai hle tura beisei a ni a. Forensic Team hi tluang taka kalpui chhunzawm zel a nih theih nan tuna training chhuak sa thawktu pathumte hian a ṭul dan angin thawktu dang hnenah training an pe chhawng zel dawn a ni.
Attachment
- Loading attachment...
