Nizan (18.2.2019) khan Chief Minister Pu Zoramthanga leh Japan International Cooperation Agency (JICA) atanga Mizorama JICA project kalpui mek endik tura Tokyo atanga lo kalte nen an inkawm.

Chief Minister Pu Zoramthanga chuan kum tam tak atang tawh a Mizoram in JICA puihna a lo dawn tawh thin avanga a lawm thu a sawi a. Buh a intodelh tura hmalak chu tul a tih thu leh an ngaihpawimawh pui avanga lawmawm a tih thu a sawi bawk. Mizoramin hma a sawn theihna tura Bamboo development kalpui tur chungchang sawi dunin, a hlawhtlin theih nan infrastructure tha neih a tul thu leh, chumi atan chuan ram pawn atanga puihna a awm theih dan tur te he meeting-ah hian sawiho a ni bawk.

Dr. Nagayo Narihide, Senior Advisor, JICA leh a thawhpuite chuan Mizoram leh JICA tangkawpin Mizoram RD block pali a project an kalpui mek chungchang leh chumi endik tura lo kal an nih thu te an sawi a. Kum 2013-14 khan JICA hian Agriculture leh Horticulture lama Mizoram a intodelh theih dan tur zirchhianna an neih hnu ah chu an zirchhianna chu a taka chantir theih a ni em tih enfiahin pilot project an kalpui mek a ni.