Vawiin chawhnu dar 1:00Pm  khan DRDA's Rural Resource Centre-ah Siaha Bawrhsap thar Pu Bhupesh Chaudhary IAS chuan Siaha district-a tlawmngai pawl hrang hrang leh zirlai pawl hruaitute thingpui inpuiah sawmin, inkawmhona hun hlimawm tak an nei.

Vawiin meeting-ah hian Pu Bhupesh chuan thu sawiin, Tlawmngai pawl te puibawmna leh thawhpuina tel lo chuan sawrkar hian mipui te tan duhthusamin hna a thawk thei lo va. Tlawmngai pawl te chu mipui aiawh leh mipui te tana ding in nih angin, khawtlang leh mipui ten harsatna an tawh hrang hrang te a hre ber leh vei ber in ni.

Chuvangin vawiinah hian in thurawn leh finchhuahna te, in puibawmna te ngen turin inkawmhona  hi ka rawt a ni. Engtik lai pawhin a pawl angin emaw a mimal ang pawn, in harsatna te, in thurawn te leh finchhuahna te dawng tur hian ka inpeih reng dawn a ni, a ti.

Tlawmngai pawl hrang hrang te chuan DC chu Siaha district-ah an lo lawm thu sawiin, tha taka an thawhpui tur thu leh sawrkar hmalakna hrang hrangah tlawmngai pawl te chu  puibawma sawm hreh loh turin an hrilh bawk.
Tlawmngai pawl hrang hrang te chuan Siaha District a lo hmasawn zual zel theih nana hmalak tur tul hrang hrang te leh District in harsatna kan tawh hrang hrang te DC hnenah an thlen bawk.

Hetianga Tlawmngai pawl leh DC inkawmhona hi hlawkthlak an tiin, review meeting hi thla khatah vawi khat tal neih ziah turin an rel bawk.

Vawiin meeting-ah hian  DC hi Pu N.Vabeiratlua DIPRO in a tawiawm a. Tlawmngai pawl hrang hrang : MTP(H),MChP(H) Group YMA, MHIP (Sub-Hqrs),YLA(Sub-Hqrs), LWA(Sub-Hqrs)  te leh MSO(H) a Office Bearer chin an telkim hle a ni.